Segun Director Edwin Roos
*no tawatin disputa of conflicto
ORANJESTAD (AAN): Director di Wit Gele Kruis, Edwin Roos, den un entrevista recien a duna di conoce cu e no a comprende e welga di Sindicato ABV dialuna ultimo. Segun el a conta, diabierna durante un reunion mensual pa trata entre otro e CAO, gerencia di WGK a wordo informa di un reunion general di e sindicato cu miembronan y tambe cu nan lo bay den accion.
Esaki, segun Roos, no solamente a cay como sorpresa, pero tambe cu e intencion ta pa haci esaki durante ora di trabou, mientras segun e, di banda di WGK no tin disputa of conflicto.
El a indica cu e reunionan ta bay bon, a palabra diferente plannan. Presidente di ABV, Gina Maduro a menciona un protocol pa mientras cu ta deliberando riba e CAO nobo, e proposicion di banda di WGK pa cuminsa cu cierto beneficionan caba entrante 1 di januari 2027.
Segun Roos, SBV a pidi gerencia di WGK pa traha e protocol mientras cu ta algo cu e sindicato mester haci. Sinembargo, gerencia a traha e protocol, y awo contra acuerdonan cu ya a wordo estableci den a combersacionnan, e protocol ta wordo desbarata. “Dus pa nos, esaki ta un sorpresa”, Roos a remarca.
El a remarca cu SBV sa kico ta e posicion di gerencia di WGK riba e beneficionan di tres diferente grupo. Entra nan, e grupo di POH, grupo di gelijkgestelden, cu ta esnan cu tin e beneficionan for di tempo cu nan tawata core paralel cu e ambtenaarnan, y e grupo cu a drenta servicio despues di 2012.
Roos a splica cu cada empleado di e tres gruponan, a firma un contract y cada un tawata conoce kico nan a firma y nan beneficionan. Den e grupo di 2012 te cu awor, ta e mesun tipo di contract. POH tambe tin mesun tipo di contract pero cu algun beneficio adicional.
El a menciona cu e acuerdo ta cu ful e grupo, esta 93 hende lo bay haya e mesun condicionnan y 27 gelijksgestelden ta keda cu loke nan tin y poco poco, ora nan baha cu pension of dicidi di retira, e grupo ta bira menos.
El a menciona tambe, den e grupo di 27 persona, 5 di nan ta den e team di maneho di WGK cu no ta cay bou di e CAO, kiermeen cu tin 22 persona cu ta gelijkgesteld.
Segun Roos, basa riba calculacionnan nobo haci basa riba e protocol cu tin acuerdo riba dje, mas placa ta bay na e empleadonan di WGK cu ta encera cu tur hende ta pareu cu e POHnan y 27 gelijkgestelden. E ora tur hende ta riba e mesun linia. Y loke e gelijkgestelden ta haya adicional ta e aumento den pensioen adicional. Y tambe un suma pa aña extra di Awg. 750,00 pa bril, suplementonan, pa paga miembrecia di gym, cu e POHnan tin caba.
“Den principio por bisa cu tur hende ta riba mesun nivel cu ta e base tambe pa nos sigui aumenta nos beneficionan segun e progreso y eficiencia pa hinca mas placa den nos personal entre otro”, Roos a remarca.
