Entrante 16 di november declaracion di inkomstenbelasting 2025 lo ta disponibel via e portal ‘BO Impuesto’ (BOi)

ORANJESTAD (AAN): Departamento di Impuesto (DIMP) ta recorda tur contribuyente cu nan lo no ricibi e conocido envelop oraño mas na cas.

Awor tur formulario di impuesto ta completamente digital incluyendo e formulario di inkomstenbelasting. Entrante 16 di november e declaracion aki lo ta oficialmente disponibel online den e portal ‘Bo Impuesto’ (BOi).

Kende mester habri un cuenta di BOi?

Tur persona cu ta un contribuyente cu cualkier tipo di impuesto mester tin un cuenta activo. Esaki ta conta pa esnan cu ta paga inkomstenbelasting, esnan cu tin un propiedad (grondbelasting), esnan cu ta paga impuesto di vehiculo (motorrijtuigbelasting) of otro tipo di impuesto.

Sesionnan di ayudo na MFA

Durante e ultimo lunanan, DIMP a organisa varios sesion di ayudo na diferente MFA. Mas di 20 funcionario publico di DIMP tabata presente na cada MFA pa yuda comunidad habri nan cuenta di BOi. E eventonan aki tabata hopi bon atendi, caminda a logra yuda alrededor di 1.200 persona den luna di october so.

E proceso pa habri un cuenta ta facil y lihe. Pa haya ayudo, mester presenta cu:

1. un cedula/identiteitsnummer of rijbewijs valido.;
2. number personal (persoonsnummer) y
3. un e-mail personal.

Mirando e demanda di comunidad y pa percura pa tur hende keda cla, DIMP ta organisando e ultimo 5 sesionnan di ayudo pa aña 2026 den luna di november y december.

• Diamars, 10 di november na MFA Noord;
• Diaranson, 11 di november na Teresita Center San Nicolas;
• Diamars, 24 di november na MFA Santa Cruz;
• Diaranson, 25 di november na MFA Paradera;
• Diahuebs, 3 di december na Teresita Center San Nicolas.

Orario parti mainta ta di 8:00AM pa 11:00AM y atardi/anochi ta di 5:00PM pa 8:00PM.

Departamento di Impuesto ta invita tur persona cu ainda mester di ayudo pa haci uzo di e ultimo oportunidadnan aki y keda cla cu nan cuenta di BOi.