Diferente reunion den Parlamento pa e ultimo dos lunanan di aña

Presidente di Parlamento Marlon Sneek:

ORANJESTAD (AAN): Parlamento di Aruba a cuminsa luna di november cu un agenda intenso, segun Presidente di Parlamento, Marlon Sneek. Entre e actividadnan tabatin diferente reunion di comision, entre otro tocante Arubus, bishitanan di EPB San Nicolas y Oranjestad, y un bishita di comision na Triple A.

  Den reunion cu Centrale Commissie diaranson, a trata e fiha un fecha pa entrega preguntanan tocante e proyecto di ley di tegemoetkoming pa mayornan di muchanan cu necesidadnan special. Sneek a splica cu e muchanan aki por bin na aanmerking pa asistencia social ora nan cumpli 16 aña, mientras cu den e añanan prome, nan mayornan ta confronta diferente reto. E proyecto di ley tin como meta brinda sosten na e mayornan y contribui na un bida digno pa e muchanan.

   Tambe a tuma lugar un reunion publico, solicita pa Fraccion di MEP, tocante e investigacion di e pasado di sclabitud. Den e contexto aki a surgi documentonan cu, segun loke a presenta, ta contene textonan cu Reina Beatrix, actualmente Princes Beatrix, a pone riba papel.

   Sneek a anuncia ademas cu diahuebs lo cuminsa e tratamento di Presupuesto Suplementario I. Pa e resto di aña, e agenda ta inclui Presupuesto Suplementario II, Tourism Product Enhancement Fund (TPEF), Presupuesto di Pais Aruba y reunionnan di e diferente comisionnan. Tambe Parlamento ta keda pendiente di posibel leynan relaciona cu contabilidad cu Gobierno por presenta.

.