Ministro Hulandes a tene audiencia cu Gobernador

ORANJESTAD (AAN): Gobernador Alfonso Boekhoudt, a ricibi e siman aki bishita di Minister Hulandes, Heleen Herbert di Asuntonan Economico y Clima pa un bishita di introduccion.

E minister ta bishitando e siman aki e partinan Caribense di Reino den cuadro di un bishita di trabao.

   Durante su bishita, e minister a reuni cu representantenan di gobierno y di sector comercial tocante e manera pa stimula e crecemento economico.

   Den e combersacion entre Gobernador y e minister a papia, entre otro, riba e sosten cu Hulanda ta brinda pa realisa e transicion pa energia sostenibel na Aruba y riba e establecimento di e Plataforma di Crecemento Economico Caribense (EGC).

   Minister Herbert a wordo acompaña durante su bishita cerca Gobernador pa Sr. Hamza Kacha (Programmamanager di e parti Caribense di Reino), Sra. Irene Uitermark (Director di Regio y Ruimte), y Sr. Gerbert Kunst (Representante di Hulanda na Aruba, Curaçao, y St. Maarten,  VNACS). Despues di su bishita na Aruba, e lo continua cu su biahe pa Corsou y Boneiro.

   E potretnan aki ta pa cortesia di Kabinet Gouverneur Aruba.