Minister di Educacion presente na inicio di e ‘Study Choice Program’

ORANJESTAD (AAN): Dialuna a cuminsa oficialmente e Study Choice Program Aruba - SEA, un programa educativo di gran importancia pa nos hubentud,

cu e estreno di e obra di teatro educativo titula "Mi Decision". Minister di Educacion, sra. Mr. Gerlien Croes, tabata presente durante e apertura aki pa compaña e studiantenan y demostra su respaldo na e iniciativa aki cu ta marca un paso decisivo den e orientacion academico di e hobennan.

E presentacion teatral "Mi Decision" a wordo desaroya specialmente pa tur studiante di 4 HAVO y 5 VWO den e parti Caribeño di Reino. E obra ta hiba e hobennan den un viahe inspirador cu ta stimula nan pa reflecciona y tuma decisionnan conscientemente tocante nan futuro. Despues di e obra di teatro, e studiantenan lo continua cu e proceso door di participa den dos tayer (workshop) cu lo tuma luga na nan mesun scol of na Universiteit di Aruba (UA).

E meta principal di e Study Choice Program ta pa traha hunto cu e alumnonan riba nan soñonan pa futuro, brindando nan e hermentnan necesario pa nan por tuma un eleccion di estudio bon pensa y responsabel.

Ministerio di Educacion ta expresa su sosten absoluto y continuo na e tipo di iniciativanan aki cu ta enrikese e formacion academico y personal di nos studiantenan. E Ministerio ta reconoce cu e transicion pa educacion superior ta bin cu hopi reto y cu un bon orientacion desde scol secundario ta esencial pa e exito di nos hobennan.

Door di apoya e Study Choice Program, e Ministerio ta reitera su compromiso pa sigui inverti den e futuro di e hubentud Arubano, garantisando cu nan ta haya e guia, e confiansa y e acompañamento adecuado pa realisa nan aspiracionnan profesional y personal.