Parlamentario Xiomara Maduro ta cuestiona MoU di Floating Farm

‘Pakico trece compania di afo, mientras nos cunukeronan no ta haya sosten?’

ORANJESTAD (AAN): Parlamentario Xiomara Maduro (MEP) a entrega 12 pregunta oficial na Minister Geoffrey Wever tocante e Memorandum of Understanding (MoU) cu Minister di Turismo Wendrick Cicilia a firma, hunto cu Aruba Ports Authority (APA), pa explora un proyecto di Floating Farm na Aruba.

   Maduro ta cuestiona e iniciativa aki, specialmente considerando cu Gobierno AVP-Futuro ainda no tin un Landsverordening Instelling Ministeries (LIM) nobo, cu mester defini e reparticion formal di responsabilidad entre ministerionan.

   “Con Minister di Turismo ta firma un MoU riba tereno di agricultura, cu ta responsabilidad di Minister Wever? Minister Cicilia a haya mandato di Conseho di Ministro pa esaki?”

   Pero e preocupacion ta bay mas leu. Segun Maduro, cunukeronan local tambe ta sorprendi cu e iniciativa. Aruba tin cunukeronan cu ta produci cuminda local caba, hopi biaha sin e sosten necesario di Gobierno. Awor Gobierno ta habri porta pa un compania di exterior.

  “Pakico Gobierno no ta cuminsa cu sostene nos propio cunukeronan? Kico ta e vision pa agricultura local? Y ki garantia tin cu e proyecto aki lo beneficia Aruba su propio productornan?”

   Maduro ta enfatisa cu innovacion ta bon, pero e no mester bin na costo di oportunidadnan pa productornan local.

   E parlamentario ta solicita claridad tocante e mandato di Minister Cicilia, e rol di Minister Wever, eventual compromiso financiero y e beneficio concreto pa Aruba. Tambe el a pidi copia completo di e MoU y contestacion dentro di tres siman.
   “Prome cu Gobierno ta habri porta pa compania di afo, laga nos sa kico Gobierno ta haci pa esnan cu ta planta y produci cuminda na Aruba caba.