Tasa di Inflacion a sigui subi den luna di September 2026

Indice di Prijs di Consumo a bira conoci

ORANJESTAD (AAN): Indice di Prijs di Consumo pa luna di September 2026 a bira conoci, den e ultimo boletin di Oficina Central di Estadistica (CBS).

   E CPI pa luna di september 2026 (112.40) a registra un subida di 0.3% compara cu e indice di luna di augustus 2026 (112.12). E cambio di e CPI pa e ultimo 12 lunanan (september 2025 te cu september 2026) ta 3.0%, un subida di 3.4 punto di porcentahe (ppt) compara cu e periodo corespondiente di aña pasa (-0.4%).

   E promedio anual (ultimo 24 luna) di e tasa di inflacion pa e periodonan di September 2024 te cu September 2025 y September 2025 te cu September 2026 ta 1.3%, un subida di 1.1 ppt compara cu e 0.2% registra den e periodonan di (September 2023 te cu September 2024 y September 2024 te cu September 2025).

   Durante luna di September 2026, 8 di e diesdos sectornan a registra subidanan di prijs. E sectornan cu tabatin e mayor impacto riba e CPI tabata “Salud” (4.4%), “Mobilario” (1.1%) y “Transporte” (0.4%), contribuyendo respectivamente cu 0.09, 0.09 y 0.05 ppt. E subidanan den e sectornan restante a contribui hunto cu 0.13 ppt na e CPI di September 2026.

   E subidanan aki a wordo parcialmente contraresta, principalmente door di un caida di 0.7% den e indice di e “Recreacion y cultura”, cu a contribui cu -0.05 ppt na e CPI. E caidanan den e sectornan restante a contribui hunto cu -0.05 ppt na e CPI di september 2026. E subida den e sector di “Salud” a wordo causa principalmente door di un subida den e categoria “Producto, aparatonan y ekipo medico” (5.7%), causando un efecto di 0.08 ppt.

   E subida den e sector di “Mobilario” a wordo causa principalmente door di un subida di 9.9% den e categoria “Aparato pa uso domestico”, causando un efecto di 0.16 ppt.

   E subida den e sector di “Transporte” a wordo causa principalmente door di un subida di 0.9% den e categoria “Gasto relaciona cu uso di vehiculo di transporte personal”, causando un efecto di 0.08 ppt. E caida den e sector di “Recreacion y cultura” a wordo causa principalmente door di un caida di 8.6% den e categoria “Corant, buki y papeleria”, causando un efecto di -0.03 ppt.

   Canasta di consumo: E canasta di consumo di e CPI ta consisti di 408 bienes y servicionan. Compara cu augustus 2026, 51.0% di e bienes y servicionan aki a registra un aumento di prijs, causando un efecto di 0.77 ppt, mientras cu 31.6% a registra un caida di prijs, contribuyendo cu un efecto di -0.52 ppt.

   Pa e restante 17.4%, no tabatin cambio di prijs. Compara cu augustus 2026, prijsnan di bienes (0.3%) y servicionan (0.2%) a conoce subida y a causa un efecto di respectivamente, 0.15 y 0.10 ppt riba e di september 2026.

   Core inflation: E asina yama CPIC (core inflation), cu ta exclui e efecto di energia y cuminda, ta wordo calcula door di compara e indice promedio di e periodo di e 12 lunanan mas reciente cu e promedio di e periodo di 12 lunanan anterior (Promedio anual).

   E CPIC a registra un aumento di 1.1% na September 2026. Pa e mesun periodo, e indice di energia, componi di electricidad, awa, gasolin y diesel, a registra un subida di 1.6%, mientras cu e indice di cuminda a aumenta cu 2.3%.

   Loke CPIC: E CPIC (core inflation) of e inflacion basico ta un porcion di e inflacion unda cierto articulonan cu tin movimientonan di prijsnan volatil ta wordo exclui, manera productonan alimenticio y energetico. Na momento cu e inflacion basico wordo calcula, e componentenan mas volatil ta wordo elimina di e inflacion total.

   E indice di e inflacion basico ta sirbi pa evalua e tendencia riba medio y largo plazo di e nivel general di prijsnan. Pa ahusta maneho monetario, hopi economista ta enfoca riba e tasa di e inflacion basico, como cu esaki ta permiti un evaluacion mas profundo di e procesonan di inflacion reciente den e economia.

   Elaboracion di un CPI tin tres meta principal. 1. Como un metodo di calculo pa compensa empleadonan pa motibo di perdida di poder di compra, ahustando nan salarionan, cu e proporcion di e cambio porcentual di CPI, locual ta conoci como indexering. 2. Como un mecanismo pa ahusta componentenan di e producto domestico bruto (GDP) di termino nominal pa termino real den Cuentanan Nacional. (Por ehempel door di elimina e efectonan di cambionan di prijs di e balor di consumo) 3. Como un medio pa gobiernonan y/of banconan central fiha obhetivonan inflacionario.