Design Academy por contribui na desaroyo di un industria creativo autentico

Prome Minister Eman:

ORANJESTAD (AAN): Prome Minister Mike Eman a bishita Design Academy, caminda el a haya un recorido pa conoce di cerca e formacion, facilidad y e trabou creativo cu alumnonan ta desaroya.

Durante e bishita, Prome Minister a pasa entre otro pa e workshop y e espacio dedica na ceramica, y a presencia alumnonan durante les, caminda e por a mira algun di nan diseño y e proceso creativo tras di nan trabou.

Pa Prome Minister Eman, desaroyo di talento den diseño tin hopi potencial cu ta bay mas leu cu educacion creativo solamente. E por contribui directamente na diversificacion economico y crea un conexion mas fuerte entre industria creativo y turismo.

Segun Prome Minister, turista cu bishita Aruba cada biaha mas ta busca productonan cu ta autentico y cu ta conta algo di identidad di nos isla. Sinembargo, Aruba ainda ta importa hopi producto cu no necesariamente ta representa e autenticidad local. Un di e motibonan, segun Premier Eman, ta cu ainda no tin suficiente diseñador y productor dedica na crea y produci productonan propio di calidad.

“Tin hopi talento na Aruba,” Prome Minister a enfatisa, indicando cu iniciativa manera Design Academy por contribui na forma un grupo mas amplio di diseñador y creador den comunidad y brinda nan un plataforma pa desaroya y presenta nan talento.

Durante e encuentro a papia tambe tocante futuro di Design Academy y necesidad pa e iniciativa haya sosten tanto for di comunidad como di Gobierno. Prome Minister a indica cu ya tin cierto apoyo, pero cu e ta mira posibilidad pa haci mas den futuro.

Tambe a intercambia idea tocante un posibel espacio adecuado pa futuro, caminda formacion y contacto cu publico por combina bou di un solo dak. Prome Minister a expresa e deseo cu Design Academy sigui crece, te na e punto cu su actual espacio bira chikito pa e demanda y talento cu e ta logra atrae.

Pa Prome Minister, crea un plataforma caminda talento creativo di Aruba por desaroya, presenta su trabou y eventualmente proyecta esaki internacionalmente ta representa un oportunidad valioso pa e isla.

Di parti di Design Academy, Loucette Reppenhagen a amplia riba e trabou cu ta tumando luga cu e alumnonan y e importancia di brinda talento creativo un espacio pa desaroya nan habilidadnan. Aki alumnonan ta haya oportunidad pa combina creatividad cu practica, experimenta cu diferente material y tecnica, y transforma nan ideanan den diseño y producto concreto. 

“Tin ontzettend veel talent op Aruba,” e mandatario a expresa, resaltando importancia di crea e plataforma necesario pa Aruba por mustra e talento aki y proyect’e na mundo.