‘Politico no por ta riba ley, pero ley tampoco por bira instrumento politico’

Parlamentario Stephany Sevinger di AVP:

ORANJESTAD (AAN): Tras e desaroyonan reciente den caso hudicial contra ex politico Otmar Oduber, Parlamentario Sevinger a enfatisa cu e no ta celebra cu un otro persona y su famia mester pasa door di un proceso asina. “Mi conoce su yiunan y mi sa, for di experiencia propio, con un caso penal contra un politico por afecta un famia completo. Mi no ta desea e experiencia aki pa ningun hende,” el a declara.

   Sinembargo, e parlamentario ta indica cu e argumento, frustracion y sentimentonan cu el a scucha durante Oduber su conferencia di prensa, e siman aki, a dun’e un sensacion fuerte di dejà vu. Y aunke e casonan no ta identico, hopi di e expresionnan cu el a tende si ta sumamente familiar.

   Sevinger ta puntra, ora husticia a bira un factor dominante den campaña, for di 2021 caba, unda meneer Oduber tabata pa bati alarma? E argumentonan cu anteriormente no tabata considera importante, awe ta bira asunto di prinsipio ora e mesun sistema toca na porta di esnan cu antes no tabata cuestion’e.

   “Mi a bisa esaki anteriormente y lo sigui ripitie: no coba un buraco pa otro awe, pasobra mañan bo mes por cay aden. E caso aki mester sirbi como un advertencia pa tur politico,” Sevinger a bisa.

  Mas aleu di un caso individual, Sevinger a expresa preocupacion tocante e futuro di gobernacion na Aruba. Segun e, cargo politico no ta ofrece inmunidad y cada decision cu viola ley mester tin consecuencia. Corupcion mester wordo investiga y combati cu firmeza, pero esaki mester sosode den un proceso husto, independiente y confiabel. “Politiconan no mester ta riba ley. Pero ley tampoco mester bira un instrumento politico,” el a declara.

   Sevinger ta adverti cu Aruba no por yega na un situacion unda cada decision ministerial dificil automaticamente ta bira base pa sospecho penal. Esaki por crea un ambiente di temor, paralisa proceso di decision y pone gobernabilidad di pais na peliger.

   “Un pais no por ta gobernabel si su lidernan ta sinti cu cada decision dificil cu nan tuma por termina den un sentencia. No malinterpretami: decisionnan cu viola ley mester tin consecuencia y corupcion mester wordo investiga. Pero esaki mester tuma lugar di manera husto, sin cu aparato hudicial ta selectivo of bou influencia politico,” Sevinger a aclara.

   E parlamentario a menciona e caso di colega De Meza como un ehempel di e peligernan cu por surgi ora husticia y politica nacional ta crusa otro. Segun Sevinger, un sospecho a obstaculisa un candidato pa ocupa e cargo di minister durante dos aña, sin cu despues tabatin consecuencia pa Ministerio Publico ora e caso no a progresa. Pa Sevinger, esaki ta crea pregunta serio tocante responsabilidad y e daño personal y politico cu un proceso prolonga por causa.

   Otro preocupacion ta e cultura cu a cuminsa desaroya, unda e condena di un politico ta wordo celebra como un medaya of presenta como un logro politico. “Husticia no mester ta un arma pa gana eleccion y un sentencia no mester bira material di campaña,” el a señala.

   Sevinger a indica cu su famia y sernan keri ainda ta biba cu e consecuencianan di e caso contra su tata. P’esey e no ta desea un experiencia similar pa ningun otro famia, pero e tampoco por ignora e ironia cu e ta observa den e situacion actual.

   “E generacion politico anterior a contribui na crea un ambiente di desconfianza rond di politica. Awor ta na mi generacion pa dicidi si nos lo continua alimenta e ambiente aki, of si nos lo crea un clima mas sano unda politica por sigui desaroya. Nos por tin diferencia profundo di opinion, pero esaki no mester haci nos enemigo,” Sevinger a conclui.