Wendrick Cicilia ta invita comunidad na Congreso di AVP di Diadomingo awo

ORANJESTAD (AAN): Wendrick Cicilia ta invita miembronan, simpatisantenan y comunidad na Congreso di AVP,

cu lo tuma luga diadomingo 4 di october 2026 na Aruba Marriott Resort Grand Ballroom, cuminsando pa 9:00 di mainta.

   Durante e Congreso, AVP lo formalisa e transferencia di liderazgo anuncia door di Mike Eman como parti di e proceso “Era di Relevo”. Pa Wendrick Cicilia, esaki ta un momento importante pa reuni como partido, reflexiona riba e caminda cu AVP a cana y mira hunto pa futuro.

   “Mi ta invita tur hende pa ta presente dia 4 di october. Congreso ta un oportunidad pa nos reuni, scucha otro y sigui construi hunto. AVP ta un partido cu historia y trayectoria y cada persona cu a dedica su tempo y energia na e partido ta parti di e historia ey,” Cicilia a expresa.

   Segun Cicilia, e compromiso di AVP pa inverti den progreso y bienestar di Aruba ta continua. E traspaso di liderazgo ta bay man den man cu un compromiso ainda mas fuerte pa scucha y traha pa tur esnan cu ta forma parti di nos comunidad.

   “Liderazgo ta rekeri pasion, responsabilidad y amor pa bo hendenan. P’esey mi ta spera mira nos miembronan, simpatisantenan y tur esnan cu kier forma parti di e combersacion dia 4 di october. Laga nos tuma e siguiente paso aki hunto,” Cicilia a conclui.