Awo tin un Diabetic Center na ImSan, ademas di ta bezig cu programa GLI

Minister di Salud Mervin Wyatt-Ras:

ORANJESTAD (AAN)-- Minister di Salud Publico, drs. Mervin Wyatt-Ras, den entrevista cu Matutino DIARIO, a elabora tocante e importancia di cuida nos salud.

“Salud ta algo cu nos tin cu cuide. Nos mester tin un miho estilo di bida, nos mester move, come saludable, nos tin tambe un Diabetic Center cu nos a inaugura luna pasa na Instituto Medico San Nicolas (ImSan), unda cu tambe ta atende cu casonan di Diabetes, y ta guia e pashent un tiki mas di cerca” e dignatario a menciona.

El a agrega cu nan ta bezig tambe cu e programa GLI, (Gecombineerde Leefstijlinterventie) cu nan ta bay pone mas atencion riba dje.

“Pa e personanan cu scoge pa haya un dieet wordo guia; nan por haci esaki tambe. Dus, nos tin varios proyecto pa atende cu diabeticonan, pero na e otro banda ta keda na pueblo tambe pa come saludabel y cuida nan curpa. Nos como gobierno, sigur lo keda asisti na esaki y nos ta spera ora nos ta bay Parlamento, nos por haya e sosten tambe, pa nos por pasa tur locual cu nos ta haci pa garantiza e bon cuido na Aruba” Minister Wyatt-Ras a subraya.