DIMP lo sigui yuda ciudadanonan registra na nan cuenta di BOi

Meverly Romano, vocero:

ORANJESTAD (AAN): Departamento di Impuesto ta sigui brinda ayudo na ciudadanonan cu tin mester. Entre otro, den e luna di september a bay na MFA’nan pa yuda ciudadanonan registra na BOi. Tambe DIMP ta yuda empleadonan di varios compania pa registra na BOi. 

Durante e 4 dianan cu por a brinda ayudo na e MFA’nan na Savaneta, Santa Cruz, Paradera, y Noord na unda cu a crea mas di 950 account na BOi. Esaki, segun Meverly Romano di DIMP a enfatisa, e departamento di Impuesto ta hopi satisfecho cu ne. El a bisa cu e atendencia di e publico tawata asina grandi cu dado momento mester a stop di duna number na hopi ciudadanonan cu a presenta. 

Romano a indica cu e servicio aki lo continua den luna di october. DIMP lo ta presente na MFA Noord dia 5 di october, MFA Savaneta dia 7 di october, MFA Paradera dia 13 di october y MFA Santa Cruz dia 15 di october. Na tur cuatro localidad, e horario lo ta di 8:00 pa 11:00 di mainta pa personanan di 65 aña of mas, y di 5:00 pa 8:00 di anochi pa personanan cu no ta pensionado. Ciudadanonan cu kier ricibi ayudo pa registra na BOi mester trece nan cedula y mester tin un persoonsnummer y un adres di e-mail. 

“Nos ta invita tur persona cu no a alcansa pa asisti pa e ayudo aki na luna di september, pa bin e luna cu ta bin pa asina nan por wordo yuda pa registra na nan cuenta di BOi. Nos ta yuda nan registra te ora cu nan log in den e portal di BOi pa nan wak nan portal. Nan no ta sali for di MFA te ora cu ful e progreso ta completa”, Romano a enfatisa.