Hilton Aruba a organiza un actividad pa honra prensa local

ORANJESTAD (AAN): Hilton Aruba Caribbean Resort tabata sa cu na comienso di luna di September durante cu ta festeha Dia di Prensa,

cu tin demasiado actividad pa pone un evento na honor di prensa cu henter aña ta duna nan cooperacion cu e Resort.

   Pesey nan a dicidi na organiza algo na final di luna di September.  Esaki a socede Diamars anochi, y tur periodista a wordo hiba pa ‘The Shore Club’, den e edificio nobo pa asina na di dos piso por mira e bunita bahada di solo, mientras tabata disfruta di un cocktail special pa tur invitado.

   Esaki tabata un momento hopi social unda periodistanan tur a sinta combersa riba tur topico, y tambe admira e bunita paisahe di Palm Beach di Aruba.

   Posteriormente e simpatica Joanne Dirksz y tambe Jessica Acevedo di e team di mercadeo, a invita e periodistanan pa baha trapi pa bay disfruta di un cena cu un menu nobo cu nan a caba di estrena.  Aki a bin topa cu David di The Shore Club, kende a duna un splicacion cu nan lo presenta tur aperitivo na e periodistanan, y despues por escoge un plato principal.

   Prensa a purba tur cos, esta ceviche, hummus, sushi, croket di cabaron, calamari, popcorn chicken, sate di galiña, burrata, y grilled Caesar salad.  Barica di periodistanan a yena y casi no tabatin lugar pa plato principal.

   Hilton Aruba a percura pa tur hende a haya bon servicio constant, cu un delicioso cuminda meticulosamente prepara, y na final tur periodista a ricibi un bunita regalo.  Palabra di danki pa e bunita atencion.