Costo di bida halto ta obliga hopi hende traha dos of tres trabao

President Diego de Cuba di Sindicato STA:

• Falta di control di producto tambe ta contribui na costo di bida halto
• Prijsnan ta subi, pero salario no ta subi pareu 

ORANJESTAD (AAN): Segun Presidente di Sindicato STA, señor Diego de Cuba, un di e motibonan principal cu costo di bida na Aruba ta hopi halto, ta cu na Aruba nos ta importa practicamente tur cos. Y ta conoci, cu unabes cu prijs di petroleo subi, tur cos ta subi pareu cu ne.

   Pero, segun de Cuba, tin cierto luganan ta abusa di e situacion y ta subi prijs di productonan, te hasta cu 400%. Cu esaki, el a enfatisa cu e control necesario no ta wordo ehecuta manera mester ta.

   Refiriendo na e canasta basico, segun señor de Cuba, CBS ta uza mas di 400 componente pa bin cu e cifra di index. Tambe, el a menciona, loke ta pisa masha hopi tambe awendia, ta specialmente prijs di huur, hipotheek y cuminda.

   Pero, nos problema na Aruba ta e salarionan cu tin, pa motibo cu e salarionan no ta crece paralelo cu e costo di bida. Esaki ta ocasiona cu hopi hende mester traha dos te hasta tres trabao pa nan por sobrevivi y paga nan recibonan fin di luna.

   Bestaansminimum pa un pareha cu dos yiu ta core rond di 5.600 Florin pa luna. Y pa un solo persona e ta 2.636 Florin pa luna. Sueldo minimo pa un persona ta core den 2.007 Florin pa luna. Ya aki tin un gap di 600 Florin.

   El a remarca cu Sociaal Economische Raad (SER) a recomenda Gobierno di Aruba pa busca manera pa aumenta salario minimo of ki componentenan nan por uza pa esaki yega te na e bestaansminimum. Esaki, segun e, ta un tarea basta pisa cu Gobierno tin pa deal cu ne.

   “Pero e hecho ta keda, cu e problema aki ta andando ya pa hopi aña caminda prijsnan di producto ta subi pero salarionan no ta subi pareu cu nan. Y esaki ta trece hopi famia den problema”, señor de Cuba e enfatisa.

   Pa conclui, señor de Cuba a remarca cu bestaansminimum no ta duna espacio pa nada otro sino pa existi. Y tin varios sistema cu por yuda e trahadonan aki. STA su pensamento ta, cu cierto porcentahe di ganashinan di companianan cu ta gana hopi placa na Aruba, por bay na e trahadornan aki cu tin salario abou.