Polis den tempo record a detene sospechosonan den caso di tiramento

Diamars tabatin losmento di tiro den Sero Colorado

• Tres persona deteni den e caso aki 

ORANJESTAD (AAN): Tabata Diamars pa 12:06’or di merdia, cu Central di Polis ta wordo informa door di un hende homber cu un rato prome un auto color blauw cu 4 homber aden a los tiro y balanan lo a impacta su auto den Sero Colorado.

   Ta asina cu Central di Polis ta despacha patruya di San Nicolas y mas unidadnan pa Sero Colorado.

   Na yegada riba e caminda bayendo direccion di Hotel Secrets a bin topa cu e chauffeur masculino den un auto color shinishi. E homber a informa polis cu un rato prome un auto KIA color blauw cu 4 homber aden lo mester a bin su tras, a los tiro cu a alcansa e su auto.

   E homber a duna descripcion di e auto y e sospechosonan.  Cu e informacion aki, di biaha Polisnan a cuminsa un buskeda pa cu e auto y e sospechosonan.

   Un rato despues ta bin topa cu e auto KIA color blauw cu probablemente lo ta esun envolvi den e caso na altura di Isaac Wagemakerstraat. E auto a wordo confisca pa mas investigacion.

  A sigui cu e buskeda y na altura di Dirkszstraat ta bin detene dos hende homber cu ta relaciona cu e caso y transporta nan pa warda di polis San Nicolas.

   Polis na Isaac Wagemakestraat ta detene despues tambe e otro sospechoso na e lugar, y e tambe a wordo transporta pa Warda di Polis San Nicolas na unda nan lo presenta dilanti un sub fiscal.

   Recherche y team forensico di BFTO a presenta pa asina haci nan investigacion.

   Bon trabao di parti tur unidadnan di San Nicolas tambe tur unidadnan cu a duna un man y den tempo record a pone man riba e sospechosonan.

   Cuerpo Policial Aruba ta haci un suplica na esnan cu sa algo, of a wak algo pa yama e tipline di polis cu ta 111-41.  Corda cu bo lo keda anonimo.