Cuatro herido den accident pisa riba Henny Eman Boulevard

ORANJESTAD (AAN): Diaranson anochi banda di 10:00 pm, ta diferente yamada a cuminza drenta na Central di Polis pa raporta un accident basta pisa cu a socede riba Henny Eman Boulevard,

apenas 10 meter pabao di e zebrapad dilanti oficina principal di Aruba Tourism Authority, na altura di Linear Park.

   Mesora unidadnan di Polis a ser manda eynan, y Centro di Alarma na su turno a manda 3 unidad di Ambulans pa duna un man.  Forensys tambe a yega na e lugar.

   Polisnan a yega y nota cu ta trata di un dalmento entre un sedan Hyundai Accent color cora cu number A-73789, y un sedan Honda City color shinishi cu number A-73466.  Testigonan a bisa Polis cu e Hyundai Accent biniendo di pariba riba Henny Eman Boulevard, a bay sorteer na su man robez pa drenta parkinglot di Linear Park, siendo cu tabatin auto ta bin di direccion contrario.  Con por ta cu e chauffeur no a mir’e?  Asina nan a dal frontal riba e Honda City.

    Debi na e impacto, en total 4 persona a resulta herida.  Autoridad a yega y haya dos persona herida sinta na rand di acera, y a haya un persona abao mey-mey di e dos autonan.  E chauffeur di e Hyundai Accent a keda sinta tras di stuur.  Paramediconan a opta pa hiba cu e persona mas herida prome cu tur pa Hospital.  Tres herido a wordo hiba cu Ambulans, y un herido a bay cu auto particular.

   Den e dalmento, e oilpan di e Hyundai Accent a kibra y hopi azeta a plama riba e acera bunita di Linear Park. Un borchi di trafico tambe a keda destrui.

   Ambos auto a keda basta destrui den e accident aki, y daño material ta inmenso.