‘Ta basta cu palabra y ta ora pa pone accion’

Eduard Pieters di PPA riba falta di accion na Parkietenbos

ORANJESTAD (AAN): Durante e reunion di diamars mainta di AWSS den Parlamento di Aruba, parlamentario Eduard Pieters di fraccion di PPA a manda un mensahe directo: ora gobierno no cumpli cu su responsabilidad basico, Parlamento mester interveni. E asunto aki no ta djis un preocupacion social, pero un problema serio di gobernacion, cu ta mustra con sistema no ta funciona manera mester ta.

   Segun Pieters, e problema no ta cuminsa na bario, pero na e proceso mes. Conforme Reglamento di Orde, un peticion pa reunion publico mester ta atendi dentro di 30 dia, pero den e caso aki e reunion aki relaciona cu AWSS y maneho di desperdicio a dura casi 9 luna.

   Pa Pieters, esaki no ta un simpel retraso administrativo, pero un señal peligroso di negligencia institucional. El a cuestiona con un pais por papia di gobernacion serio, si ni su propio regla nan no ta respeta, pasobra cada biaha cu sistema faya, confianza di pueblo ta debilita.

   Bario ta paga e prijs di inaccion: E realidad mas duro ta sinti den e barionan manera Cas Paloma, Ser’i Teishi Parkietenbos y Simeon Antonio, unda Pieters personalmente pa papia cu e habitantenan y mira cu su propio wowo e situacion real.

   Den e henter e asunto delicado aki, historia ta ripiti su mes: un biaha mas ta haci e promesanan durante campaña, pero solucion concreto no ta yega. E sentimento cu ta domina ta uno di cansancio y frustracion, pasobra e hendenan aki no ta pidi luho, loke nan ta pidi ta algo basico; un gobierno cu ta responde.

   Pieters a laga cla cu esaki no ta un pelea di partido. “Aki no ta MEP of AVP, aki ta pueblo cu ta sufri,” el a enfatisa. Pero den e mesun momento, el a indica unda e responsabilidad mester ta: riba gobierno. No por normalisa ni hustifica falta di accion, pasobra gobernacion no ta un opcion, ta un obligacion cu ta bin cu e mandato di pueblo.

   PPA ta exigi accion, no promesa: Den e contexto aki, fraccion di PPA a sostene e mocion cu ta exigi un plan di accion cla y inmediato. Pa Pieters, esaki no ta algo simbolico, pero necesario pa forza movimento. Pueblo no ta pidi mas estudio, ni mas rapportnan, ni mas promesa, nan ta exigi resultado concreto cu por cambia nan realidad. Sin accion, cada palabra ta keda bashi.

   Pa Pieters, e situacion aki ta un prueba directo di con gobierno ta funciona. Ta un momento di berdad, unda lo bira cla si sistema ta responde na pueblo of si e ta move solamente ora presion aumenta. El a recorda cu gobernacion no ta midi pa discurso ni intencion, pero pa impacto real den bida di ciudadano.

   Ultimatum: Den su stemvotering, e tono a bira contundente. Pueblo di Cas Paloma, Ser’i Teishi, Parkietenbos y Simon Antonio no por sigui warda sin limite.

   Pieters a laga sa, cu si gobierno no actua cu urgencia, Parlamento lo haci tur loke ta na su alcance pa no ignora e yamada ey. Su mensahe final a resumi e situacion sin biramento rond: pueblo no ta pidi, pueblo ta exigi y un gobierno serio mester responde cu accion, no cu silencio y discurso bunita.