Awo e bala ta den man di Gobierno

Parlamentario Evelyn Wever-Croes

“Gobierno mester bay recobra tur e placa y terenonan cu a wordo horta, y duna nan bek na pueblo” 

ORANJESTAD (AAN): Diahuebs, Parlamento a trata e tema di oportunidadnan petrolero pa Aruba. Parlamentario Evelyn Wever-Croes, probechando cu Minister di Husticia ta e minister encarga pa duna cuenta riba e tema aki, despues di varios luna cu a Fraccion di MEP a yama e reunion importante aki, a desvia un rato cortico di e tema aki, pa puntra e minister tocante e veredicto di e caso Avestruz di su colega di partido, Benny Sevinger. E parlamentario a enfatisa cu esaki ta tambe e pregunta cu su Fraccion lo haci tur minister cu presenta pa duna cuenta den Parlamento. 

E parlamentario a enfatisa cu e caso aki ta e caso di corupcion di mas grandi cu nos pais a conoce. Un castigo combina di 11 aña pa diferente acusado, na unda cu Sevinger a haya mas aña di castigo. 

El a indica cu Hoge Raad a indica den e veredicto, y Hof tambe, cua ta e pasonan cu Gobierno por tuma pa cu e terenonan cu Benny Sevinger a tuma. Den su disertacion, e parlamentario a puntra e Minister di Husticia cu ta encarga cu casonan huridico di pais Aruba, si e lo bay sigui indicacionnan di e veredicto y traha riba e ‘schade y regres’. 

Segun e veredicto, Gobierno por cuminsa busca e placa y e terenonan cu a wordo duna na forma iregular door di Benny Sevinger. 

Esaki, segun Parlamentario Wever-Croes, ta loke cu pueblo tambe kier sa. Pasobra ta hopi ciudadano ta puntrando esey y por mira esaki riba diferente plataforma social. 

“Pueblo ta puntra ki dia e placa y e terenonan ta bin bek. Awo cu e caso Avestruz, e caso di corupcion di mas grandi cu Aruba a conoce, a yega na su final, Gobierno mester bay recobra tur e placa y terenonan cu a wordo horta, y duna nan bek na pueblo. Awo e bala ta den man di Gobierno”, e parlamentario a expresa.