Aruba ta prohibi tur Electric Step den area di Hotel

ORANJESTAD (AAN): Diamars mainta, Ministerio di Husticia a divulga cu basa riba leynan y revision di reglanan,

a dicidi cu ningun Electric Step no ta permiti mas pa core riba acera, ni riba caminda, y tampoco por laga nan staciona riba acera tur caminda.

   Ministro Arthur Dowers a bisa cu tur Electric Step cu ta para riba tereno publico, ta ilegal na Aruba.  No tin ningun caminda den ley regla cu bo mag di core cu e Electric Step aki riba caretera.  E siguiente paso ta cu dentro di poco, Polis lo bay pasa kita tur Electric Step cu haya ta core riba caminda, y tambe kita tur cu wordo haya para riba tereno publico.

   Gobierno a bisa cu por ehemplo tur compania di Car Rental ta registra na Gobierno, pero nan no sa di ningun compania di Electric Step cu ta registra!  Si haya un hende, sea turista of local, ta core cu Electric Step riba caretera of riba walkway, e lo wordo kita.

   No djis den area turistico, ta bay actua contra tur esnan cu ta core Electric Step otro caminda, hasta si bo ta core cu nan riba Green Corridor, WVB Boulevard, of riba caminda di Santa Cruz of door di Savaneta.  Dentro di poco e accion lo start riba esaki.