Pasaheronan casi a perde nan vuelo pa Aruba debi na rij largo di Security na Bogota

The content originally appeared on: Diario

Famia a bin duna sugerencia

ORANJESTAD (AAN): Un famia kende recien a tuma un vuelo den oranan di mainta for di Bogota pa Aruba, a acerca DIARIO pa asina duna un splicacion riba e nivel di stress cu nan a topa cune pa asina por a subi nan avion pa bin rumbo e isla aki bek.

   E cabayero a splica cu e vuelo ta sali 7:30 am, y tur hende ta dunabo recomendacion pa bo percura pa bo tey na Aeropuerto di Bogota como 3 ora prome cu esaki.

   “Mi tin di avisa tur hende cu ta bayendo Colombia, pa por fabor tuma bon nota cu esaki no ta cuadra mas,” e cabayero a indica na DIARIO.

   “Aworaki e mihor sugerencia ta pa bo yega 4 ora prome cu vuelo na Aeropuerto di Bogota”.

   Den nan caso, nan a yega pa 4:30 am pa e vuelo aki na Aeropuerto.  Pa nan sorpresa, e fila pa bo check-in ta asina largo.  “E rijnan ta asina largo, pues a dura masha hopi mes pa nos porfin a yega na e counter y check-in y entrega nos maletanan,” e pasahero a bisa.

   Rij mas largo ainda pa Security:  Ora cu nan a caba di check-in y ta bayendo pa pasa door di Security pa revisa nan carry-on y tur cos riba nan curpa, nan a spanta.  E rij di esaki tabata hopi largo mes.

   E momento ey ya caba tabata 6:10 am, y casi e rij no ta move den e Aeropuerto.  Pasaheronan zundrando paki-paya, y djis bo tin di keda hopi largo para pa move poco-poco bay dilanti.

   “Nos a mira algun pasahero ta yora di berdad, pasobra bo ta tende nan ta keha cu nan lo bay perde nan vuelo,” e cabayero a indica na DIARIO.

   “Nos a keda cla te banda di 7:15 am, y pa colmo e avion ta poni na un Gate Number masha leu mes.   Nos mester a core y dal un looppas constant pa por a yega na e porta.  Nos tabata e ultimo pasaheronan cu a subi e avion.”

   Debi na esey, nan no a ni haya chens di cumpra desayuno, of souvenirs, keshi, algo di Duty Free, y nada.

   Pa e motibo ey, e famia ta sugeri tur hende cu tin di acudi na Aeropuerto El Dorado na Bogota, pa por fabor yega kizas 4 ora adelanta.   Pues envez di yega 4:30 am, mihor bo yega 3:30 am, pa asina bo ta mas safe.

   Manera ta conoci, no ta Aeropuerto di Bogota so tin problema cu rij largo e dianan aki.  Informe a mustra cu e.o. Aeropuerto di Miami, Aeropuerto di Atlanta, y lo peor aworaki ta Aeropuerto di Schiphol (Amsterdam) cu tin rij sin stop di hende pa pasa door di Security.