Vehiculonan electrico no ta cumpli cu rekisitonan di e Ley di Vehiculo

Segun Directora di DIMP Luenne Gomez-Pieters:

• Nan no mag di ta riba careteranan publico
• Nan lo no pasa keur di DTI 

ORANJESTAD (AAN): Directora di Departamento di Impuesto, señora Luenne Gomez-Pieters, den un entrevista cu DIARIO a elabora riba e topico cu actualmente ta hopi den noticia. Ta trata aki di vehiculonan electronico entre otro e-bikes, e-steps y e-choppers. El a remarca cu tin dos aspecto hopi importante pa loke ta trata e tipo di vehiculonan electronico aki. E prome ta si nan ta permiti di ta riba careteranan publico y e otro ta ki tipo di impuesto e doñonan di esakinan mester paga.

   Señora Gomez-Pieters a remarca cu segun ley y proceso actual na Aruba, e vehiculonan aki ta mara na e landsverordening wegverkeer y tambe na landsbesluit voorschriften voertuigen. E ultimo aki, segun el a menciona, ta duna e cuadro legal na vehiculonan di motor y ki tipo di vehiculonan di motor mag di ta riba nos careteranan publico. Den esaki ta inclui si e vehiculo tin porta, luz, seatbelt, spiel etc. DTI ta controla y keur e vehiculonan di motor aki segun e cuadro legal.

   Despues cu vehiculonan di motor wordo gekeur pa DTI segun e proceso actual den cuadro di ley, nan mester registra na DIMP pa impuesto di vehiculo di motor. Na momento cu esaki pasa, nan ta haya plachi di number di auto. Depende e categoria di e vehiculo di motor, ta haya plachi number A pa auto. B pa bus, T y O pa busnan cu ta duna servicio di tour, TX pa taxi, MFA y MFV (huur) pa brommer.

   Pa loke ta trata e vehiculonan electronico, señora Gomez-Pieters a enfatisa cu esaki ta un desafio pasobra nan no ta cumpli cu e rikisitonan di e landsbesluit voorschriften voertuigen. Por lo tanto tambe, nan lo no pasa keuring di DTI, por lo tanto, nan no mag di ta riba nos careteranan publico.

   E negoshi di e vehiculonan aki, a crece pareu cu economia pero ta causante di hopi accidente y ta hopi peligroso segun e conclusionnan di e comision institui door di Gobierno di Aruba. E comision a duna conseho na Minister di Husticia Arthur Dowers kende a menciona cu lo kita e tipo di vehiculonan aki for di nos careteranan publico pasobra nan ta ilegal y no mag di ta riba careteranan publico.