Recherche di San Nicolas a captura 5 persona y confisca 4 arma di candela

Investigacion y accion exitoso:

• Nan ta envolvi den recien casonan di tiramento 

ORANJESTAD (AAN): Den cuadro di casonan serio di tiramento na San Nicolas a tuma lugar un investigacion riguroso, cauteloso y eficaz pero tambe bon coordina dirigi pa Recherchenan di San Nicolas cu sosten di polis uniforma di San Nicolas como tambe K9 Unit.

   A ehecuta diferente accion pero tambe razzia den San Nicolas cu a duna su resultado positivo.

   Relaciona cu e tiramentonan recien, a logra confisca 4 arma di candela.

   Tambe a haci diferente detencion relaciona cu esaki.  Oficialnan hudicial a haci 3 detencion pa diferente caso di tiramento den e bario di Village. E detencionnan ta trata di hende homber y mucha homber di inicialnan:  Z.O.G.J. di 20 aña naci na Aruba, C.A.G. di 21 aña naci na Aruba, y e menor di edad J.N.A.V.K. di 17 aña naci na Aruba.

   Pa e casonan di tiramento den De Vuyst tabata tin 2 detencion. Ta trata di  e hombernan di inicialnan  A.A.B. di 31 aña naci na Aruba, y M.T.C. di 27 aña naci na Aruba.

   No ta descarta cu den e dianan nos dilanti lo tin mas detencion. Recherche di San Nicolas ta trahando incansablemente pa revolve tur caso tambe pa kita arma di candela for di caminda.

   Cuerpo Policial Aruba ta haci un suplica na comunidad cu sa of wak algo pa yama e tiplijn di polis cu ta 11141. Bo ta keda 100% anonimo.