Fiscal a dicidi cu lo persigui agente policial relaciona cu incidente fatal

Caso di tiramento na Pos Abao

• Corte lo tin un regiezitting aki par di siman 

ORANJESTAD (AAN): E caso cu a socede na comienso di aña aki den Pos Abao, unda cu un agente policial a los tiro y un persona di 36 aña di edad a fayece, awor Ministerio Publico a saca citacion contra e Polis relaciona cu un incidente fatal cu a tuma lugar riba Diamars 27 di januari 2026 alrededor di 3:10 pm.

   Durante e incidente ey, un habitante kende tabata wordo considera como un persona den estado di confusion mental, a perde su bida.  E patruya di Polis supuestamente a bay brinda asistencia na e ‘FACT Team’ di Respaldo pa yuda atende un pashent.  E cas aki ta situa como 200 meter patras di Eagle Bowling.  E agente policial envolvi di inicialnan R.W.A.R. ta wordo sospecha di homicidio.

   Den e caso aki, e victima Frank Miguel Henriquez a perde su bida.

  Awor e regiezitting den e caso ta planea pa Diahuebs 26 di November venidero. Durante e regiezitting aki, abogado di e Polis lo haya oportunidad pa presenta eventual peticionnan adicional di investigacion. Hues lo dicidi si e peticionnan aki ta wordo aproba y lo tambe determina un fecha pa e tratamento mes di e

caso.

   Ministerio Publico a pone famia di e fayecido na haltura caba di e decision pa persigui e agente Policial.