Decision casi dictatorial di Gobierno pa hisa salario minimo sin kier dialoga prome

Francis Saladin di CUA:

• Cuestiona conocemento di Premier pa maneha un negoshi 

ORANJESTAD (AAN): Vicepresidente di Comerciante Uni Aruba (CUA), señor Francis Saladin, a critica Gobierno di Aruba durante un rueda di prensa pa su maneho relaciona cu costo di bida. Segun Saladin, Gobierno ta señala comercio como responsable cu poder di compra a bay atras, mientras cu diferente medida gubernamental a contribui na aumenta e carganan financiero riba tanto comercio como riba nos pueblo.

   Entre otro, el a menciona introduccion di BBO na frontera, aumento di BBO y otro impuestonan, tarifanan di awa y coriente, y gastonan pa recoleccion di desperdicio. Segun Saladin, tur e carganan aki tin un impacto directo riba costo di operacion di negoshinan y, consecuentemente, riba costo di bida.

   Saladin a enfatisa cu CUA ta reconoce e necesidad pa atende e problema di costo di bida. Sinembargo, e gremio no ta di acuerdo cu e manera cu Gobierno kier haci esaki. El a califica e proceder di Gobierno como “casi dictatorial”, señalando cu Gobierno ta decidi pa hisa salario minimo y mara esaki na e bestaansminimum, sin un dialogo previo cu comercio. Despues, segun e, Gobierno ta spera cu e sector comercial presenta sugerencianan adicional pa mitiga e impacto.

   Vicepresidente di CUA a reacciona tambe riba declaracionnan di Prome Minister Mike Eman cu, segun Saladin, ta minimisa e efecto di costo di personal riba prijs. Saladin a cuestiona e conocemento di e mandatario tocante funcionamiento di un negoshi y a sostene cu costo di personal ta representa un di e gastonan principal pa mayoria compania.

   El a splica cu, ora e gastonan aki subi, empresanan ta enfrenta presion pa sea adapta nan prijs of reduci nan cantidad di empleado pa por cubri e aumento. Den su opinion, no ta posibel ni sostenibel pa comercio sigui absorbe carganan adicional mientras Gobierno ta sigui impone mas impuesto riba lomba di comerciante.

   Saladin a indica cu CUA ta dispuesto pa traha hunto cu Gobierno na solucionnan creativo y duradero cu por alivia costo di bida. Pa logra esaki, e ta sostene cu Gobierno tambe mester baha su propio gastonan y reduci e impacto di impuesto riba comercio y pueblo.

   Den e contexto aki, el a critica loke e ta considera un decision popular pero descabeya cu por tin consecuencianan economico duradero. Segun Saladin, no ta responsabel pa Prome Minister tuma un decision di tal magnitud y descabey djies pasobra Prome Minister Eman ta cera su carera politico den un paar di luna.

   Saladin a agrega e hecho cu anteriormente a tuma decision descabeya tempo a introduci BAVP pa decisionnan descabeya cu a wordo tuma cu a laga nos cu un mega debe. E ta puntra Prome Minister, “Bo kier bolbe tuma un decision descabeya y laga economia cu un mega problema? Esaki no por”, Saladin a questiona.

   Saladin a conclui cu CUA ta aboga pa dialogo y un responsabilidad comparti, den cua Gobierno y sector comercial ta contribui na solucionnan cu ta mehora poder di compra sin compromete continuidad di empresanan y empleonan.