Parlamentario Otami Thomasia ta propone servicio centralisa y mas partera pa garantisa continuidad di cuido

ORANJESTAD (AAN): Parlamentario di AVP, Otami S.S. Thomasia, ta boga pa un evaluacion serio di un modelo centralisa pa

servicio di partera na Aruba, combina cu un plan pa aumenta e cantidad di profesionalnan. Despues di e reunion di e siman aki cuAsociacion di Partera, Thomasia ta enfatisa cu e preocupacionnan conoci mester wordo traduci den solucionnan concreto, responsabilidadnan defini y un plazo cla pa accion.

Den e prome parti di su relato, e parlamentario a aborda e reduccion den cantidad di partera y e presion cu esaki ta pone riba continuidad di cuido. Den e segundo parti aki, e ta concentra riba proposicionnan pa fortifica e servicio y crea condicionnan di trabou mas sostenibel.

“Nos conoce e problema. Awor nos mester determina kico nos ta haci pa solucional’e, ken ta asumi responsabilidad y pa ki fecha nos pueblo por spera resultado,” Thomasia a expresa.

-Modelo Centralisa pa Facilidad y Responsabilidad

Un di e proposicionnan ta pa reorganisa e servicio segun un modelo centralisa, similar na e concepto di HOED cu ta existi pa dokternan di cas. Den e modelo proponi, parteranan por traha for di un localidad central, comparti facilidadnan y organisa un sistema di rotacion di trabou.

Esaki por permiti cu, mientras algun partera ta atende pashent na e localidad, otro ta haci bishita na cas of ta disponibel pa parto y emergencia. Alabes, e sistema mester crea espacio pa descanso programa y reemplaso durante vakantie of enfermedad.

Thomasia a splica cu e proposicion ta dirigi riba un distribucion mas balansa di responsabilidad, cu continuidad di cuido y bienestar di e profesionalnan como prioridad.

“Un sistema di cuido no por sigui depende di sacrificio personal di e profesionalnan cu ta mantene e servicio ta funciona. Descanso y reemplaso mester forma parti di e organisacion normal di cuido,” el a enfatisa.

Pa e parlamentario, gobierno y AZV mester evalua e modelo seriamente. Si tin obstaculonan administrativo, legal of relaciona cu e manera cu AZV ta evalua e proposicion, mester aclaria esakinan pa por determina con ta supera nan.

-Mas Profesional

Ademas di reorganisacion, Thomasia ta considera necesario pa traha riba un plan pa atrae por lo menos dos partera adicional, cu e meta di yega na un minimo di seis profesional.

Segun e informacion presenta, Aruba tin actualmente cuater partera, cu e preocupacion cu e cantidad por baha pa tres na september 2027. E perspectiva aki, segun Thomasia, ta exigi planificacion anticipa pa evita cu e presion riba e servicio sigui aumenta.

-Preguntay Agenda pa Solucion

Thomasia a dirigi pregunta parlamentario oficial na Ministro di Salud, drs. Melvin Wyatt-Ras, pa solicita claridad riba e posicion di gobierno y AZV respecto na un modelo similar na HOED pa parteranan, e obstaculonan cu ta stroba progreso, e necesidad di mas profesional y e posibilidad di establece un plan concreto pa implementacion.

Tambe e ta solicita pa gobierno, AZV y Asociacion di Parteranan sinta na mesa cu un agenda cla, responsabilidad nan defini y un fecha concreto pa presenta solucionnan.

“Mi intencionta pa contribuina un solucion realistico y sostenibel, cu ta tene cuenta cu e realidad diario di nos parteranan y ta pone siguridad di mama y baby na prome luga,” Thomasia a declara.

E parlamentario a conclui cu cuido di calidad durante embarazo, parto y despues di parto ta un necesidad fundamental pa bienestar di famianan y futuro di Aruba. P’esey, e siguimento mester ta dirigi riba decisionnan y accionnan cu por garantisa e cuido aki, tanto awe como den e añanan cu ta bin.