Esaki ta ultimo siman pa firma e acuerdo entre e instancianan concerni

Dani Fernandez Perna di Sindicato di Polis

• Si acaso no logra e ora accion ta cuminza 

ORANJESTAD (AAN)- Dani Fernandez Perna, Representante di Sindicato di Polis (SPA), den entrevista cu DIARIO a duna di conoce cu siman pasa, nan a sinta cu Respaldo, unda nan tabata tin un combersacion hopi fructifero, den cual nan a pasa riba tur e puntonan door di e Convenio y ambos partido a yega na un acuerdo, pero nan ta wardando riba un di tres partner cu ta Ambulance (ImSan),  pa loke ta e transport di e pashentnan.

   Pero e acuerdo no a wordo firma ainda, y esaki ta e ultimo siman pa haci esaki, si no Polis ta bay den accion. El a relata e situacion.

   “Esaki ta djis un proceso di trabao, esta con cada instancia tin cu actua na momento cu ta trata di un pashent di Respaldo of cualkier persona cu un comportacion incomprendible. Pero, na final di dia ora nos ta papiando di e convenio aki, mientras tanto nos ta den proceso di firma esaki nos ta hayando mas y mas di e situacionnan aki pa dia. Kiermen di, manera nos a splica dos siman pasa, nos ta bay tuma accion mirando cu nada no ta bezig ta wordo haci, y leiding mes no ta worry cu esaki.

   Nos como sindicato tin cu para tras di nos leiding y para firme cu nan, cu falta seis dia pa yega 1 di November, y si e fecha aki yega y nada a wordo firma nos ta bay tuma accion di pasa e number di Crisis Team-Respaldo pa e personanan cu ta bezig deal cu e pashentnan aki”, Dani Fernandez Perna, di SPA a relata, reiterando cu esaki ta e ultimo siman cu Leiding tin pa cana su caminda.

   El a sigui splica cu esaki ta un acuerdo entre instancianan, no tin nada di ley, sino gewoon cu cada ken ta tirando nan trabao riba otro, anto nan no kier tuma responsabilidad, pasobra na final di dia si algo bay robes, un instancia mester wordo teni responsabel.

   “Y hopi biaha, mirando cu nos ta esunnan cu ta bay prome na e lugar, cu nos ta esunnan cu tin cu mantene orden publico, y esey ta pidi tur hende, hopi biaha nan ta tire riba nos, y nos di Cuerpo Policial a cansa di dje caba, cu nos ta atendiendo cu trabaonan cu no ta ni cay pa nos. Nos miembronan t’asina disgusta cu hasta ta papia di walk out”, Fernandez Perna a remarca.

   El a agrega cu SPA ta tratando di evita esaki, pasobra na final di dia Polis ta unico cu tin pa proteha nos tur.

Mirando cu e problema di salud mental ta aumentando; incluso ta presente den mucha y hoben caba, locual e sindicato a bin cu ne, y SPA a sinta papi’e cu Lito Lacle ta, bin cu un module p’asina e wordo implementa for di Opleiding School p’asina por mustra, for di trempan caba, con pa atende cu un persona cu un actitud asina desconoci, y splica nan kico e proceso ta pa cada instancia mantene nan mes, y actua conforme nan trabao y para responsabel p’e. El a reitera cu esaki ta ultimo siman pa firma e acuerdo y si no, accion ta bay cuminza!