Hopi hende asombra cu fayecimento di e homber alegre conoci como ‘Payaso Keke’

E ta e detenido cu a fayece siman pasa

ORANJESTAD (AAN): Hopi hende kendenan siman pasa a tuma nota di e detenido masculino kende a wordo haya fo’i tino den cel di Warda di Polis na Noord, y cu un dia despues a fayece na Hospital, no a cay facilmente riba e nomber di Juan C. Croes, conoci como ‘Carlitos’.

   Pero nan pensamento a cambia rapido, ora cu a bira conoci cu e Carlitos aki a trece na bida e famoso personahe di ‘Payaso Keke’ na Aruba, y hopi activo den distrito di Noord, pero tambe otro barionan di e isla.

   Payaso Keke a bira popular den decada di aña 2000, ora cu e tabata duna presentacion como Payaso Keke ta varios scol den distrito di Noord.  Cualkier actividad cu scolnan tin, e tey presente pa anima e muchanan, y regala nan animalnan traha di blaas na forma fenomenal.

   Contrario na e ultimo informe di su bida, Payaso Keke tabata conoci como un persona cu stima mucha, y tabata tuma su trabao na serio.  E tabata anima muchanan pone nan hari cada rato.  Pesey mes algun scol tabata busca Payaso Keke pa tey presente riba e prome dia di scol, pa asina cana rond y kita e nerviosismo di muchanan cu ta yega eynan pa prome biaha.

   Pero no ta eynan so!  Payaso Keke tabata wordo busca pa anima fiestanan priva, y tambe actividadnan publico.  DIARIO a tuma nota cu e tabata anima eventonan na e.o. Paseo Herencia, tambe na Plaza Betico den curason di Santa Cruz.

   Na Plaza Betico, Carlitos Croes tabata yega eynan bisti na Payaso cu semper ta presente hunto cu su famia bendiendo su Popcorn y hopi otro cosnan mas y entreteniendo e muchanan durante di fiestanan Nacional ariba Plaza Betico Croes, riba peticion di Comision CCDN.

   Pa tur e Scolnan, y comisionnan aki, Carlitos Croes semper tabata un persona cu ta atende hende cu respet, puntual y amabel.  Su amigonan a indica cu di naturaleza, e no ta un persona agresivo.  Aunke a indica cu ultimo tempo a haya tiki dificultad cu adiccion, y tabata haya sosten di famia pa sali did je.

   Awor LandsRecherche ta investigando e caso pa haya sa kico a socede.  Ademas te ainda no a anuncia oficialmente fecha di entiero di Payaso Keke.  Condolencia ainda na su famia-, amigo, y fanaticonan di dje.