Hof di Corte a declara keho di Chania contra Hues no funda

Caso di accident fatal di Januari...

• Exigi Hues haci investigacion no ta cay bao su cualificacion
• Dia 18 November 2026 e mesun Hues lo sigui trata e caso

ORANJESTAD (AAN): Diabierna mainta tres Hues cu ta forma parti di Corte di Husticia di Aruba, a forma Hof pa trata e keho di Chania Chante Fernandes Pedra contra e Hues cu ta tratando e caso penal di Ministerio Publico contra Chania Chante Fernandes Pedra.

   Manera ta conoci, Fiscal ta acusa Chania cu riba Diadomingo 4 Januari 2026 a dal mata e dama Josely Paulina Vasquez (65) y e homber Carlos David Vialez Valerio (54) y sigui core bay. Manera ta conoci, dia 4 November 2026, Chania a keha e Hues cu a dicidi cu ta bay trata e caso pasobra atrobe Chania no a presenta cu abogado y Hues ta mira cu e oportunidadnan pa Chania haya un abogado ta masha abao mes.

   Ta asina cu abogado mr. Odor a representa Chania den e caso di keho contra Hues.

Hof a bisa cu e Hues concerni a reacciona riba e keho. Mr. Odor a bisa cu e no a haya e reaccion. Hof a duna mr. Odor un copia y a pospone e caso un rato pa asina e abogado por bay lesa e reaccion di Hues riba e keho.  

  Por a mira e Fiscal cu a presenta e acusacionnan contra Chania presente pero no a sinta na e lugar cu Fiscal ta sinta esta na man drechi di mesa di Corte. E tabata sinta na un di e mesanan di abogado.

   KEHO CONTRA HUES: Abogado mr. Odor a splica cu Diahuebs nochi e mayornan di Chania a bay cerca dje y dun’e un cantidad di documento pa presenta e keho contra Hues. E abogado a bisa cu y ayera mainta el a bay cerca Chania na KIA pa papia cun’e y awor ta den Corte.

   VIOLA DERECHONAN FUNDAMENTAL: E abogado a bisa cu durante e procedura di e caso, e Hues no a honra peticion di Chania pa lag’e liber. E abogado a mustra cu cada vez Chania no a haya abogado. El a mustra cu dia 4 November 2026, Hues a bisa cu e chensnan pa haya un abogado a caba y a dicidi di trata e caso.

   E abogado ta haya cu Hues a viola Chania su derechonan fundamental door di no sigui busca manera pa Chania haya un abogado. E keho ta cu Hues tabata sa cu Chania no ta dispone di abogado pa defende su interesnan. E abogado a menciona cu dia 3 Juni 2026, Hues a bisa Chania cu e mes mester busca un abogado for di Curacao y paga esaki. E abogado ta haya cu Hues no a haci esfuerzonan suficiente pa Chania haya un abogado.

   E abogado a mustra cu dia 20 Augustus 2026, atrobe Chania a presenta sin abogado y a presenta diferente peticionnan cu e ta desea pa keda realiza. Hues a rechaza e peticion pa scucha 2 testigo. Hues a bisa cu door di nan situacion mental, e no ta haya cu por bay scucha nan como testigo. Tambe Hues a rechaza e peticion pa haci reconstruccion di e accidente. Segun abogado, door cu Chania no tabatin abogado, no por a hustifica e peticion di reconstruccion. E mesun dia, atrobe Hues a rechaza e peticion pa laga Chania liber.

   E abogado a mustra cu Chania a presenta un cantidad di argumentonan riba papel pero Hues a bisa cu e ta demasiado pa bay evalua tur e documentonan.

   E abogado a cuestiona e hecho cu tabatin dos abogado di Curacao disponibel y diripiente nan no tey mas door di mal comprendemento. E ta haya cu Hues mester a haci mas investigacion den esaki pa haya sa kico a pasa cu Chania no por a scoge entre e dos abogadonan y cu a bin un otro abogado cu Chania a rechaza pasobra e no a papia cun’e.

   TUR HENDE TIN DERECHO DI ABOGADO: E abogado a mustra cu a manda documentonan y un USB Memory-stick pa Hues relaciona cu e caso y Hues a nenga e USB Stick.

   E abogado a bisa Hof cu tur hende mester tin e derecho pa haya un abogado. E abogado ta haya cu mester scucha combersacionnan cu tabatin cu abogadonan cu a wordo acerca pa haya sa kico realmente a pasa cu nan no ta disponibel pa defende Chania.

   PROCESO INHUSTO:  E abogado a mustra cu dia 4 November 2026, Chania a bolbe pidi pa lag’e liber pa asina e por traha y busca un abogado pa prepara pa e caso. Hues a rechaza e peticion. E abogado ta haya cu mester investiga cu e mesun Hues cada vez ta rechaza e peticion di Chania cu ta stroba Chania pa por prepara debidamente pa e caso y haya un abogado. E abogado a bisa cu e ta haya cu tin un proceso di husticia inhusto y pesey ta keha e Hues. El a pidi Hof pa un otro Hues no partidario y independiente pa trata e caso.

   Hof a puntra mr. Odor si e ta e abogado di Chania den e caso penal tambe. mr. Odor a bisa cu e ta representa Chania pa e keho so. El a sigui bisa cu e no sa ainda si e lo bay representa Chania den e caso penal. El a bisa Hof cu e mayornan a keda di mande e documentonan di e caso pa e evalua.

   Hof a pospone e caso pa evalua si por tuma un decision di biaha of si lo mester bay studia e documentonan mas.

    NO TIN PUNTONAN VALIDO PA HACI KEHO: Hof a dura un tempo promer cu a bolbe den sala di Corte y a bisa cu ta tuma decision di biaha. Hof a bisa cu e peticionnan pa haci mas investigacionnan cu abogado ta referi na dje, esakinan ta cay for di e cualificacion di Hues. Hof ta considera nan no admisibel.

   Hof a bisa cu a base di ley, ora di keho contra di Hues, mester para e caso di biaha. Si tin keho, mester haci’e di biaha y no warda cu ta laga acumula puntonan.

   Na opinion di Hof, si tabatin cosnan manera e abogado ta menciona, mester a haci keho for di e momento ey y no warda te awor pa haci esaki. Hof ta haya cu no tabatin motibonan pa haci keho promer cu 4 November 2026. Pa loke ta e keho di 4 November 2026, Hof ta haya cu abogado no ta menciona nada di loke a sosode riba 4 November 2026 den e keho cu a haci.

   KEHO CONTRA HUES NO TA FUNDA: Hof a mustra cu mester menciona tur e puntonan for di momento cu ta haci e keho. No por presenta esakinan durante tratamento di e caso pasobra e Hues concerni no tey pa defende su mes. Pa loke ta e keho riba nengamento di peticion pa mas investigacion, Hof ta haya cu no por papia cu ta keha Hues. Hof ta haya cu no tabatin motibo. Hof ta haya e keho contra Hues no funda. Hof a mustra cu e decision di Hues cu ta trata e caso sin abogado, no ta motibo pa keha Hues.

   Hof a dicidi cu e mesun Hues ta sigui trata e caso y cu dia 18 November 2026, e Hues ta sigui cu e caso caminda a lag’e.