ORANJESTAD (AAN): Diabierna marduga, alarma a wordo bati instantaneamente na momento cu e mashin sofistica di ATM Smart Deposit di Aruba Bank na Paradera a detecta actonan inusual na e aparato.
A resulta cu anti-social(nan) a pensa cu lo ta facil pa forza y horta for di e aparato aki, cu clientenan ta uza pa deposita placa sea Florin of Dollars. Nan a focus riba e porta mas pafo, cu tin bao di e pantaya y keyboard.
Cu esfuerzo nan a logra habri e porta ey. Pero pa nan sorpresa, e ladronnan di awa dushi a bin topa cu un porta paden cu ta mas bien parce di ta un tanki di guera reforza.
Ni maske kico nan a haci, e porta aki ta un di e nivelnan di mas halto di proteccion cu e aparato aki ta dispone di dje.
Mirando cu nan no a logra y cu sea Polis of Security lo yega mesora, nan a core baha na awa. Ora cu Security a yega, mesora a seya e area y a keda eynan ta vigila te ora cu Polis a yega mas despues.
Pues e mashin parti paden a keda intacto, ta djis e parti pafo a wordo forza pero esey ta djis algo ‘cosmetico’. Polis tin atencion pa e caso, y lo revisa tur video tanto esnan na e Plaza di ATM Mashin aki, y tambe cameranan cu tin den e area.
Ya caba pa oranan di merdia, tecniconan a drecha e mashin manera por mira riba e potret aki.
