Autor hoben Anthony Carvajal Rivera a presenta su prome buki na Prome Minister Mike Eman

ORANJESTAD (AAN): E hoben escritor Anthony Carvajal Rivera, studiante di Ibero American High School y autor di e buki “Mi Brillante Esplendor”,

a bishita Prome Minister Mike Eman pa presenta su prome obra literario, cu a publica recien internacionalmente cu sosten di Europa Editions di Madrid.

E reunion a brinda un oportunidad special pa reconoce talento, dedicacion y perseverancia di un hoben cu a logra converti su pasion pa scirbi den un publicacion internacional. Anthony a comparti cu e decision pa bishita Prome Minister Mike Eman a bin despues cu el a ricibi e copianan oficial di su buki.

“Despues cu mi a logra publica e obra internacionalmente, mi a pensa ken tabata e persona indicada pa comparti e logro aki. Mi a considera cu e Ministerio encarga cu Cultura tabata e luga corecto, pasobra e buki aki ta un muestra di talento cu ta desaroya na Aruba,” Anthony a expresa.

Prome Minister Mike Eman a felicita Anthony pa e logro importante logra na un edad asina hoben y a subraya cu su exito ta un ehempel positivo pa otro hobennan.

"Ta un honor pa ricibi e hoben Anthony Carvajal Rivera, autor di “Mi Brillante Esplendor”. E publicacion aki ta un muestra di hopi trabou, creatividad y perseverancia. Nos ta orguyoso di su logro y nos ta spera cu e lo sigui desaroya su talento y su carera literario," Prome Minister Eman a bisa.

Anthony Junior Carvajal Rivera a nace na Bogotá, Colombia, dia 7 di juni 2010. Segun e biografia publica den su buki, for di un edad hopi jong el a descubri den poesia un manera special pa expresa emocion, reflexion y experencia di bida. Su prome versiculo a sirbi como un refugio creativo caminda el a explora temanan manera amor, falta di amor y e diferente emocionnan cu ta parti di crecemento personal. Cu tempo, e pasion aki a sigui crece te ora cu el a culmina den su prome publicacion literario, “My Brilliant Splendor”.

Durante e encuentro, Anthony a comparti cu e obra ta enfoca principalmente riba e concepto di prome amor. Sinembargo, segun e, e nificacion di amor den e buki ta mucho mas amplio cu djis amor romantico.

"Mi ta kere cu nos tur tin un prome amor. E por ta amor pa un persona, pero tambe e por ta amor pa un hobby, un arte, un profesion of algo cu realmente ta conmove bo. Esey ta e mensahe principal cu mi kier comparti," Anthony a splica.

Anthony a conta cu su interes den scirbimento a cuminsa como un hobby. Inicialmente el a scirbi su pensamentonan y poemanan na man, den un notebook, y despues a transferi nan pa formato digital. Tambe el a comparti cu e proceso pa publica un buki a dura mas o menos un aña y cu durante e trayecto el a siña hopi di e industria di publicacion y di su mes. E ta un experencia cu ta yuda bo crece como escritor y como persona,” el a comenta.

Anthony a informa cu despues di a investiga diferente posibilidad pa publica su obra, el a haña un cas di publicacion Europeo y a manda su manuscrito pa evaluacion. Finalmente, e esfuerso a produci resultadonan positivo cu a culmina den e publicacion oficial di “Mi Brillante Esplendor”.

Un di e mensahenan principal cu Anthony kier comparti cu otro hobennan ta cu nan mester durf di sigui loke nan ta gusta y no laga miedo stroba nan. E ta kere cu cada persona tin e derecho pa desaroya nan talento.

Anthony a califica su encuentro cu Prome Minister Mike Eman como hopi positivo y inspirativo.