Accident pisa registra riba Diabierna merdia na Kamay

Chauffeur burachi coriendo duro den su banda robes

ORANJESTAD (AAN): Apenas 12’or di merdia a bati, y ya caba tabatin un homber pata-pata burachi coriendo auto den distrito di Noord, y a bay ocasiona un accident pisa riba caminda di Noord pa Westpunt, na altura di Kamay.

   E prome yamadanan a cuminza drenta poco prome cu 12:30 pm, indicando cu un accident pisa a caba di socede na e T-Weg cu tin na Kamay, net banda di Yen Yen Bar & Restaurant, y tambe dilanti NG’s Supermarket.

   Mesora a cuminza manda Polis, Ambulance, Vehiculo di Rescate, y Roadservice pa e luga di accident.  A manda Bombero eynan debi cu yamadanan ta indica cu tin hende pega den auto.

   E prome unidad di Polis cu a yega na e lugar, a bin haya un truck septico Oops Out para banda pabao di caminda, y un auto sedan Kia Optima cu a draai 180º y bay para bek pariba di caminda net na e T-weg nobo bao construccion.

   Testigonan a splica cu e Kia Optima ta bin for di Saliña Cerca ta bayendo zuid y ora cu el a yega den area di Kamay el a cuminza core na banda robez di caminda.  El a bay direct riba e truck di Oops Out cu tabata bin di zuid.  Chauffeur di e truck a purba hala na su man robez pa evita di dal frontal, pero toch nan a dal den otro na forma violento.

   E truck a bay banda pabao, y a pasa raspa e parti dilanti di e Truck di entrega di Coca-Cola, y bay finaliza dilanti NG’s Supermarket.  E truck di Oops Out a ricibi basta daño material, y e Kia Optima a keda total loss.

   E chauffeur den e Kia no por a sali di e vehiculo, y pesey Bomberonan a coordina e accion pa sak’e di e vehiculo, hunto cu Paramediconan, kendenan a yega eynan cu 2 unidad di Ambulance.

   Tin indicacion cu Polis lo a test e chauffeur asina mes y a resulta cu e tabata basta bao influencia.  El a wordo hiba Hospital pa ricibi tratamento.  E caminda mes a keda cu bastante material di e vehiculonan y e auto abao, y pesey e pida ey a permanece cera pa algun rato.