Gobierno ta logrando cambionan apesar di e carga di ocho aña di negligencia

Segun Prome Minister Mike Eman;

ORANJESTAD (AAN): Gobierno AVP Futuro ta trahando tur dia pa renoba edificionan den Oranjestad. Entre otro Museum Willem III Toren, edificio bieu di Ministerio Publico, edificio di Veneranda. Hunto cu esakinan, tin diferente proyecto di sector priva cu a inicia den Caya Grandi. 

Prome Minister Mike Eman a expresa cu tur cos ta un peso adicional ora cu no solamente mester a cuminsa desaroya e trabounan pero mester haal in pa motibo di un carga di ocho aña unda cu nada a wordo haci. Ocho aña di negligencia cu por ser nota den sociedad, den falta di mantencion y perspectiva. 

Segun e, e gobierno anterior no solamente a laga atras un retraso. Calculacion den e retraso di mantencion ta pasa 1 biyon florin. Bou di esaki ta inclui, scolnan cu no a wordo renoba, careteranan, edificionan monumental y di gobierno. 

“E ta un carga cu e pais aki a keda cu ne. Pero poco poco nos ta cambia e direccion ey y den e aña y mei di gobernacion aki, ya ta cuminsa mira e cambio”, Prome Minister Eman a enfatisa. 

Segun Prome Minister, e ta un crimen contra nos sociedad cu cosnan aki a wordo laga asina. Gobierno ta trahando na unda cu tur siman nan ta den un otro bario. Actualmente ta haciendo trabounan di renobacion den Village. A caba di drecha Mabon y lo sigui cu barionan cu no a haya atencion y a keda totalmente bandona cu canchanan recreativo den mal estado. 

El a menciona cu dentro di poco lo cuminsa haci renobacion di structura den De Vuyst y Bushiri. “Tur e barionan ta forma parti di e calidad di bida di nos sociedad y esaki ta e trabounan cu e gobierno aki ta enfoca riba nan”, Prome Minister a enfatisa. 

El a duna di conoce sinembargo, cu a inverti placa den e poder di compra. A duna 500 florin extra pa luna na 22 mil pensionado y den caso di pareha, esaki ta 900 florin pa luna. Tambe a aumenta bijstand cu casi 30 % di mehoracion. Pakete di remedi tambe a wordo compensa. 

“Prome espacionan cu nos a crea door di kita gastonan necesario tawata pa e poder di compra”, Prome Minister Eman a duna di conoce.