Voz di pueblo a haya oido den e cambionan di maneho di erfpacht

Parlamentario di AVP, Stephany Sevinger

*Bon stap, pero e trabou ainda no a termina 

ORANJESTAD (AAN): Parlamentario di Partido di Pueblo Arubano, AVP Stephany Sevinger ta expresa su satisfaccion cu e reciente anuncio di Minister di Infrastructura, drs. René Herdé, tocante e cambionan den e maneho di tereno erfpacht. Segun Sevinger, diferente di e medidanan anuncia ta coresponde cu varios di e puntonan cu el a presenta na Parlamento durante e debate di 20 di augustus, aña pasa, ora el a introduci un mocion cu e meta di haci e otorgamento di erfpacht mas humano, realistico y accesibel pa famianan Arubiano.

“Ta duna mi satisfaccion pa mira cu hopi di e preocupacion y propuestanan cu mi a comparti den parlamento awor ta haya eco den e politica di gobierno. Esaki ta confirma cu e proceso democratico ta funciona y cu e voz di pueblo, ora e wordo hiba cu conviccion y responsabilidad, por traduci den cambionan concreto,” Sevinger a declara.

Den su mocion, e parlamentario a pidi atencion pa diferente rekisito cu, den su opinion, tabata un obstaculo innecesario pa hopi famia local cu tabata desea pa construi nan cas propio. Entre e puntonan menciona tabatin e porcentahe obligatorio di construccion, e calculacion di e bouwprijs pa meter cuadra, e obligacion di presenta un hipoteca bancario como unico prueba di capacidad financiero, e plazonan estricto pa cuminsa y completa construccion, y e necesidad di crea un solucion pa personanan cu anteriormente a perde nan opcion pa un tereno estatal.

Tocante e ultimo aki, Parlamentario Sevinger ta sigui considera di gran importancia pa ciudadanonan cu den pasado a perde nan opcion pa un tereno di dominio publico pasobra nan no por a cumpli cu e rekisitonan estricto cu tabata vigente e momento ey, haya un segundo oportunidad. P’esey, el lo sigui insisti pa gobierno crea un mecanismo cu ta permiti nan inscribi atrobe y pa evalua nan peticion bou di e politica nobo. “Mi ta kere cu tin hopi famia afecta door di un sistema cu no tabata adapta na realidad di nan situacion. Ora nos ta coregi e politica, nos mester coregi tambe e consecuencia cu e politica anterior a causa,” Sevinger a declara.

Pa Sevinger, e echo cu varios di e puntonan aki awor ta incorpora den e politica nobo ta representa un paso positivo den direccion corecto. “Mi no ta mira esaki como un logro personal, sino como un victoria pa tur ciudadano cu durante hopi aña a comparti nan preocupacionnan y cu a pidi un sistema mas husto y mas adapta na realidad di nos pueblo.”

E parlamentario a enfatisa cu e resultado aki ta mustra e importancia di un Parlamento cu ta cumpli su rol di controla, propone y representa e interes di comunidad. “Mi ta aprecia cu gobierno a scucha e debate, a reconoce cu tabatin espacio pa mehora e maneho existente y a cumpli cu e mandato cu a sali di Parlamento di Aruba. Esaki ta fortalece confianza den nos institucionnan democratico.”

Sinembargo, Sevinger a enfatisa cu e trabou no a caba. Ainda tin diferente aspecto cu mester sigui desaroya y materialisa pa logra un sistema realmente accesibel, transparente y eficiente pa asignacion di tereno erfpacht.

“Esaki ta un stap importante, pero no ta e destino final. Mi lo sigui vigila atentamente con e cambionan ta wordo implementa y sigui trece na atencion di gobierno otro puntonan cu ainda merece solucion.”

Den conclusion, Stephany Sevinger a reafirma su compromiso cu sigui representa e voz di pueblo den parlamento. “Mi compromiso ta pa sigui traha pa e famianan cu kier construi nan futuro na Aruba. Cada stap cu nos logra duna den direccion di un sistema mas humano y mas husto ta confirma cu perseverancia, dialogo y participacion democratico realmente por haci diferencia.”