Hues a nenga peticion di sospechoso di hit-and-run pa haya libertad

*Hues a obliga abogado Moszkowicz pa kita toga den sala di Corte

ORANJESTAD (AAN): Diabierna mainta e muhe hoben Chania Chante Fernandes Pedra di 24 aña, a presenta dilanti Hues pa e caso penal cu Ministerio Publico a cuminsa contra dje. Fiscal a presenta 5 acusacion contra Fernandes Pedra relaciona cu e lamentable accidente di 4 Januari 2026, caminda Fernandes Pedra a dal cu e Jeep cu e tabata maneha, e dama peaton Josely Paulina Vasquez Gonzalez di 65 aña y Carlos David Vialez Valerio di 54 aña mata y sigui core bay.

   Ta asina cu tratamento di e caso no a sigui y a keda pospone pa 2 October 2026. Hues a rechaza e peticion di Fernandes Pedra pa e bay den libertad.

   Siguridad na Corte: Por a nota cu miembronan di CEA tabata hopi atento pa cu e famianan di e victimanan y famia di e acusado. E famianan di e victimanan a sinta den sala abao mientras cu e famianan di e acusado a sinta den e parti ariba (di dos piso).

   Hues a para Abogado Hulandes: Tabata un sorpresa ora cu e abogado Hulandes, Moszkowicz a presenta na Corte. Miembronan di CEA a para e abogado kende a bisti su toga y kier a representa Fernandes Pedra. El a presenta den sala di Corte cu e toga habri, cual ta un falta di respet pa Corte.

   Segun protocol, tanto Hues, Fiscal y abogado ta bista e toga cu tur e botonnan sera.  Pero mr. Moszkowicz a drenta cu su toga habri y sin e dashi blanco.

   Hues a bisa cu e ta reconoce Moszkowicz for di Hulanda. Di biaha Fiscal a reacciona y bisa Hues cu Moszkowicz no tin derecho di bisti toga y cu e ta crea confusion pa prensa y otronan cu e lo ta abogado di Fernandes Pedra siendo cu no ta asina.

   Hues a puntra Moszkowicz pakico e tin toga bisti. Moszkowicz a contesta cu e no ta den sala como abogado pero e ta e abogado di Fernandes Pedra. Hues a bisa cu e ora ey Moszkowicz no por tin toga bisti. Di biaha Moszkowicz a kita su toga.

   Sospechoso no tin abogado: Hues a bisa 10 April 2026 tabatin caso pro forma caminda abogadonan mr. Illes y mr. Emerencia tabata representa Fernandes Pedra. Hues a bisa cu e dia ey e Hues di Corte a dicidi cu Fernandes Pedra ta keda encarcela y cu psicologo mester traha un raport di e situacion di Fernandes Pedra. Tambe tabatin peticion pa scucha 2 testigo. A manda e caso pa Hues Comisario pa scucha e testigonan.

   Hues a mustra cu 8 Juni 2026, a haya carta di psicologo pa stop scucha e testigonan. Dia 9 Juni 2026, Fiscal a reacciona cu e no tin nada contra pasobra tin imagennan. Despues e abogadonan mr. Illes y mr. Emerencia a informa Hues cu tin otro abogado mr. Boyce. Abogado mr. Boyce a informa Hues cu tin un peticion na Curacao pa permiti abogado di Hulanda, Moszkowicz, por representa Fernandes Pedra. 

   Hues a sigui bisa cu 12 Juni 2026, total di 2 carta bay Corte caminda mr. Illes y mr. Emerencia a desisti di ta abogado di Fernandes Pedra. Hues a remarca cu promer cu Hof a tuma un decision, 17 Juni 2026, mr. Boyce ta retira di e caso. Fiscal a reacciona cu si mr. Boyce no tey mas, Fernandes Pedra no tin abogado. Hues a mustra cu despues a haya carta di Moszkowicz cu ta informa cu mr. Boyce no a retira completo.

   Moszkowicz no tin permiso: Hues a mustra cu dia 22 Juni 2026, Hof a dicidi cu Moszkowicz no ta permiti pa actua como abogado di Fernandes Pedra.  Corte Comun di Husticia di Caribe Hulandes no ta haya cu e caso ta asina special cu mester di expertismo special pa atende e caso. Hues a bisa cu Corte a puntra mr. Boyce si e ta e abogado y si por trata e caso 3 Juli 2026. Dia 25 Juni 2026 Hues a haya carta di mr. Boyce cu e no ta abogado mas di Fernandes Pedra y cu e no ta den posicion di tuma un decision pa ki dia trata e caso.

   Hues a mustra cu dos dia pasa, na prizon di KIA a presenta Moszkowicz, pa kende mr. Boyce a haci peticion pa Moszkowicz bay bishita Fernandes Pedra.

   Hues a mustra cu Diabierna mainta el a haya carta di Moszkowicz cu e no ta di acuerdo cu decision di Hof. Hues a puntra con lo bay sigui awor. Na opinion di Hues, ta bon pa Fernandes Pedra tin abogado. Hues a mustra cu Hof a tuma decision cu Moskowicz no por defende e acusado Fernandes Pedra y esey ta punto final.

   Hues a puntra Fiscal si a check cu Orden di Abogado. Fiscal a bisa Hues cu a acerca Orden di Abogado y no a haya reaccion.

   Sospechoso a pidi Hues reconsidera: Ta asina cu Fernandes Pedra na dado momento a lesa un carta pa Hues. E tabata hopi emociona. El a bisa cu actual e no tin abogado. El a bisa cu e tin pleno confianza den Moszkowicz.

   Hues a puntra Fernandes Pedra pakico e abogadonan mr. Illes y mr. Emerencia a retira. Fernandes Pedra a bisa cu e no por bisa. El a sigui bisa cu e ta haya cu awor cu e no tin abogado, e ta confia den Moszkowicz. El a pid Hues pa reconsidera Miszkowicz. Tambe el a pidi pa lag’e den libertad pa asina por prepara pa e caso.

   Sospechoso ta keda encarcela: Fiscal a bisa cu e no por tuma decision riba e peticion pa laga Moszkowicz ta abogado. Fiscal ta haya cu lo mester mira con e sospechoso lo por haya un abogado. El a bisa cu loke si e por tuma decision ta riba e peticion di Fernandes Pedra pa lag’e liber.

   Fiscal ta reacciona cu no por laga Fernandes Pedra liber. Na opinion di Fiscal, e sopechoso a core hopi duro riba Lloyd G. Smith Boulevard caminda tin hotel y casino estableci. Fiscal ta haya cu ainda tin acusacionnan serio contra Fernandes Pedra caminda tin castigo di 8 aña di prizon ta colga riba su cabez.

   Fiscal a remarca cu e famia di Fernandes Pedra a bay media y Ministerio Publico mester a reacciona pa aclarea e expresionnan. Na opinion di Fiscal, ta obvio cu comunidad lo keda den shock si laga Fernandes Pedra liber. Fiscal ta haya cu tin motibo di peso y no tin chens cu Fernandes Pedra por bay liber.

Hues a pospone e caso pa bay evalua y tuma un decision. Hues a bolbe den sala di Corte y a bisa cu e lo pospone e caso pa 20 Augustus 2026, caminda lo bay evalua con leu ta y tratamento di e caso lo ta 2 October 2026.

   Sospechoso mester busca un abogado: Hues a enfatisa cu ta importante cu pa dia 20 Augustus., Fernandes Pedra tin un abogado. Hues a bisa cu si Hof bolbe nenga e peticion di Fernandes Pedra pa e wordo asisti door di Moszkowicz, Fernandes Pedra mester busca un otro abogado, of di Aruba of den exterior pero cu ta registra na Aruba. Hues a sigui bisa cu 20 Augustus 2026 lo por tin resultado riba investigacion di e ‘ECM Computer’ di e Jeep Grand Cherokee. Tambe lo por spera cu psicologo lo keda cla cu e raport.

   Hues a mustra cu riba e peticion di Fernandes Pedra pa lag’e liber, Fiscal ta contra di esaki. Hues a bisa cu e tambe ta haya cu Fernandes Pedra mester keda sera den KIA. El a mustra cu Hues Comisario y Hof ta haya cu Fernandes Pedra mester keda sera mirando e acusacionnan grave contra dje pa un caso hopi serio. Hues a bisa cu e caso aki a causa hopi reaccion den comunidad.

   Hues a remarca cu si laga Fernandes Pedra liber, lo bay causa hopi mas reaccion. Hues no ta mira condicion pa laga Fernandes Pedra den liber. Esey ta encera cu Fernandes Pedra ta keda encarcela te 2 October 2026 ora cu lo trata e caso.