Embaraso hubenil ta aumenta durante periodonan di vakantie

Señora Monique Giel-Labad di Wit Gele Kruis:

ORANJESTAD (AAN) Cifranan di aña pasa ta mustra cu e cantidad di embaraso hubenil na Aruba ta aumenta principalmente durante e periodonan di vakantie, tanto vakantie grandi di juli-augustus como e vakantie di december. Asina señora Monique Giel-Labad di Wit Gele Kruis (WGK) a indica. Segun Giel-Labad, e situacion aki ta relaciona cu hopi hoben cu ta keda nan so na cas durante e periodonan aki.

   Segun Giel-Labad, apesar cu no tur famia tin e posibilidad financiero pa pone nan yiunan den actividadnan durante vakantie, ta importante pa mayornan busca solucionnan accesibel pa evita cu muchanan ta pasa hopi tempo sin supervision. El a señala cu e falta di supervision por pone hobennan den situacionnan cu por cambia nan bida pa semper.

   Un di e preocupacionnan mayor ta e facilidad cu hobennan ta haci contacto via medianan social manera TikTok y Instagram. Segun informacion cu WGK a recopila, hopi di e encuentronan aki ta cuminsa online y despues termina den encuentronan personal, unda relacionnan sexual ta tuma luga.

  Giel-Labad a indica cu den hopi caso, e embaraso ta resulta di e prome contacto sexual. Ademas, mayoria biaha e mucha muhe apenas conoce e mucha homber tata di e yiu; hopi biaha nan no sa unda e ta biba ni tin otro informacion personal di dje. Mayoria di e hobennan cu ta involucra den e situacionnan aki tin entre 15 y 16 aña.

   Aunke scolnan ta ofrece educacion sexual y charlanan preventivo, Giel-Labad ta enfatisa cu e responsabilidad principal ta sigui cay riba mayornan. Segun e, tambe ta necesario pa mayornan recibi orientacion y informacion pa nan comprende con e situacionnan aki ta desaroya den realidad.

   “E momento cu un hoben keda sin supervision por ta suficiente pa un decision cu tin consecuencia pa resto di su bida,” Giel-Labad a bisa. El a comparti cu WGK ta mira regularmente casonan unda mayor ta presente na cas, pero no ta consciente di loke ta pasa. Entre otro, el a menciona situacionnan unda un mucha homber ta wordo permiti pa bay camber di e mucha muhe mientras mayor ta ocupa cu otro actividad den cas, resultando den un relacion sexual cu ta termina den un embaraso.

   Giel-Labad ta insisti cu supervision activo ta esencial y cu mayornan mester pone limitenan cla. Tambe mayornan por haya charlanan pa nan ta informa di e realidad di situacionnan actual na Aruba pa asina nan comprende pakico supervision ta asina necesario. “Si mayornan sa con e situacionnan aki realmente ta desaroya, nan lo comprende miho di con supervision continuo ta asina importante,” el a enfatisa.

   Cu e vakantie grandi den porta, WGK ta haci un yamada na tur mayor pa busca alternativanan apropia pa mantene nan yiunan ocupa y supervisa. Actividadnan manera lesnan di cushina, arte, deporte of otro hobby adapta na interes di e hoben por contribui significativamente na reduci e riesgonan durante e vakantie.