Luznan di varios veld rond di Aruba ta wordo cambia of renoba

Minister Gerlien Croes ta indica:

ORANJESTAD (AAN)-- Minister Gerlien Croes a declara den entrevista cu DIARIO, cu locual e no ta compronde ta cu scogencianan ta wordo haci, tin biaha, na un forma straño.

   Esaki pasobra el a wordo bisa door di FFD cu nan no por a haci nada cu e luznan y ta p’esey nan a cera Joe Laveist Sport Park. “Pero di con algun siman atras nan por a haci algo cu e luznan di Winston, si, pero bo no por a haci algo cu esnan di Joe Laveist. Mientras tanto e luznan di Winston tambe a wordo baha, y nos ta awo pendiente di tur e luznan pasobra tin mas luz cu ta wordo instala rond di Aruba, no solamente esnan di Winston.

   Nos tin un serie di veld cu ta bay haya sea luz nobo of renobacion di luz, por ehemplo tambe e luznan di RCA. Pues tur esaki ta canando pero nos ta wardando wak si nos ta haya e overdrachtsdossier, di 15 aña atras pa nos habri dialogo cu ASU. Nos tin preocupacion tambe cu locual ta e situacion cu FFD, y ta bay bin un momento cu nos ta bay elabora un tiki mas riba e resultado di e onderzoek. E ta den man di abogado y lo bay papia tocante esaki y kico ta e pasonan cu ta bay tuma”, e dignatario a señala.