A intercepta boto cu 2 persona indocumenta abordo y droga intercepta

Persecusion riba lama

ORANJESTAD (AAN): Tabata Diaranson siman pasa den oranan di anochi, cu e avion di Wardacosta bulando den region, a detecta un boto sospechoso cu tabata nabegando cu basta velocidad den direccion di Aruba.

   E informe a wordo pasa, y e sede di Wardacosta na Aruba, mesora a saca algun unidad di boto rapido tipo Metal Shark.  E botonan aki di Wardacosta a cuminza move den direccion di e area unda e boto sospechoso ta nabegando.

   Ora cu a yega cerca, a nota cu ta trata di un boto venezolano, y esnan abordo no kier a obedece ordo y a djis sigui move.  Asina Wardacosta a nota cu abordo di e boto aki tin varios ‘bulto’ poni.

   E personal di Wardacosta a start cu un persecucion y durante di e maniobranan aki, e oficialnan a los algun tiro di advertencia den laira pa obliga e capitan di e boto pa e stop.

   Finalmente despues di basta maniobra, e patruyeronan den Metal Shark a intercepta e boto sospechoso, cu tabata moviendo cu 2 Outboard engine di marca Yamaha di 40HP cada uno.  Oficialnan a bay abordo pa detene e dos personanan, y asina a hiba e boto na e pier di Wardacosta na Savaneta.

   Unabes cu a yega na e pier di Wardacosta, a haya sa cu e 2 sospechosonan Venezolano ta indocumenta, y e bultonan cu droga ilegal a keda entrega na Cuerpo Policial di Aruba.  Lamentabelmente manera ta socede ultimo tempo, e ‘peso’ den kilo di e droga no a wordo divulga.

   Pero si Wardacosta a splica cu e droga a ser destrui. E caso ta den investigacion y Cuerpo Policial di

Aruba no ta descarta posibilidad pa mas detencion.  Aki por mira e boto confisca na Pier di Wardacosta.