Piscado cu a muri na Corsou a resulta di ta boluntario di CITRO

WILLEMSTAD: Riba Dialuna a sali e informe di un caso serio cu a socede Diasabra na Fuikbaai na isla di Corsou. 

E prome informe ta mustra cu un boto di piscado a bay dal riba e barancanan di Fuik.

   Wardacosta a ricibi e informe y nan a core notifica e organizacion boluntario di Search & Rescue, esta CITRO cu tin na sede eynan mes na Caracasbaai.

   Wardacosta a splica cu e piscado lo a purba pa pusha pa baha e boto bek di baranca, pero el a bay dal den e chapaleta (propeller) di e boto, y haya heridanan fatal eynan.

   CITRO a splica cu nan prome informe ta cu e boto di piscado a dal contra barancanan, y e ta bezig ta sink net na entrada di Fuikbaai.  Nan a haya detaye cu e doño di boto a bula na awa, y tabata trata di tene e boto for di barancanan.  Pero haciendo esaki el a bay resulta bao di e boto, y fayece.  Nan a haya detaye extra cu e piscado tabata hunto cu su señora riba e boto.

   A haya informacion rapido na CITRO, cu e victima tabata un pensionado capitan di CITRO, un amigo di hopi boluntario na e organizacion.  Cu yudanza di dos sambuyado di Sandals Diving, e tripulacion a logra saca e victima y a traslad’e pa e sede di e boto.

   Su señora, kende a wordo hiba tera cu yudansa di un Seadoo, abordo di un otro boto piscado, a wordo hiba na e sede di Boto pa asina spera yegada di autoridad.

   Tur miembro di CITRO kendenan tabata envolvi den e rescate di e accident tragico aki, a ricibi asistencia di Slachtofferhulp pa por procesa e sucedido na un forma adecuado.

   CITRO ta desea famia y tur amigo di Krik Parrel hopi forza.