Miembro di AVP mustra riba caminda deplorabel na Palm Beach

ORANJESTAD (AAN): Ing. Carlos A. Bermudez e siman aki a haci pregunta oficial tocante e estado deplorabel di caminda grandi di Bubali pa Palm Beach.

   E preguntanan el a dirigi na Ministro Rene Herdé, pa haya claridad tocante e estado deplorabel di e caminda cu ta conecta e rotonde banda di Super Food cu e rotonde di Palm Beach. E iniciativa aki a sigui despues cu Bermudez a ricibi varios keho di residente, automobilista y chauffeur di taxi tocante e condicion di e ruta.

   Segun Bermudez, e caminda ta mustra desgaste serio, cu hopi buraco, iregularidad den e asfalt y falta di mantencion, loke no solamente ta afecta comodidad di chauffeur, sino cu tambe ta crea situacionnan peligroso pa siguridad di trafico. Considerando cu esaki ta un di e camindanan mas transita di Aruba, e parlamentario ta considera cu accion rapido ta absolutamente necesario.

   Den su preguntanan oficial, Bermudez ta pidi e titular di infrastructura pa informa si e ministerio ta na altura di e mal estado di e caminda, ki plan concreto tin pa ehecuta mantencion y si tin intencion pa pone un capa nobo di asfalt riba e ruta. Ademas, e ta solicita un indicacion di e fecha cu e trabao lo cuminsa y ki tempo ta proyecta pa su finalisacion.

   "Nos infraestructura vial mester brinda siguridad y confianza na tur usuario. Ora un caminda di tanto importancia ta bira un fuente di preocupacion pa conductor y residente, ta deber di gobierno pa actua cu rapidez," Bermudez a declara.  E ta spera cu e preguntanan lo contribui na un solucion rapido.