Keto bay San Nicolas no tin ningun blueprint pa su futuro

Errol de Freitas di SNBA:

ORANJESTAD (AAN): President di San Nicolas Business Association (SNBA), esta Errol de Freitas a expresa riba con e Dialogo Social a desaroya su mes algun tempo pasa.

   Den entrevista cu DIARIO, el a mustra cu den e ultimo Dialogo Social na Aruba, den e gruponan cu a participa, tabatin algun grupo cu tabatin 8 punto di discusion, otro cu 6 punto, etc.

   “Nos di SNBA tabatin 50 punto, y e otro gruponan a puntra con bin SNBA tin 50 punto.  Nos a bisa cu esey ta claro, pasobra nos ta abandona.  Ami no tin cunes ta cua politico, cua Minister kier papia, pero nos na San Nicolas ta abandona,” de Freitas a declara.

   “Nos ta bandona keto bay, y mi ta aprecia e esfuerzonan di kier yuda Bernhardstraat, pero hopi no ta completamente berdad.  San Nicolas tin problemanan social, tin problemanan comercial, tambe industrial.  Anto e proposicionnan cu ta riba mesa no tin hiba un base, pa loke ta e compleho grandi di refineria cu tin na San Nicolas,” e president di SNBA a bisa.

   E dirigente di SNBA a sigui papia di e refineria: “E industria cu nos conoce ey mester bin bek den un of otro forma, pero e ta algo serio.  Pa mi bisa berdad, mi tabatin contacto cu un oficial di Gobierno y nos tabatin varios luna ta tene reunion, pero esey a stop.   Pa otro siman tabatin planea pa SNBA tene su Cumbre, esta e ‘The 3rd San Nicolas Business Summit’ anto nos ta bay haya nos mes ta pospone esey pa un luna.  Tur esey pavia cu a haya sa cu Parlamento ta den reces, siendo cu fraccionnan a wordo invita pa atende e Cumbre.”

   Semper na Cumbre di SNBA nan ta invita Gobernador, como cu nan sa cu Boekhoudt ta un ciudadano di San Nicolas anto su curazon ta eynan.  Tambe ora mira e lista di invitadonan, tur esey ta pa papia encuanto San Nicolas, e.o. papia di e siguiente inversionistanan.  Pero a bin ta ripara cu tin algun Ministro cu ta haci cosnan chikito, y a wordo priminti cu lo tene un reunion di Conseho di Ministro na San Nicolas, pero nada ainda.

   E siman aki atrobe ta manda un carta pa Gobierno pa puntra nan con a para. Pasobra ta mira Ministronan ta parando cu yen di plan ta papia.  Pero e unico cu a expone su plan pa tur hende mira, tabata SNBA.  Awor ya nan ta den parti di ehecuta e plan, pero ta ripara cu hasta den tur esaki tin yen di politica ta andando paralelo cu esey.

   Ningun desaroyo ainda di berdad no a socede na San Nicolas, y loke Gobierno ta haci de vez en cuando ta puro cosnan ‘cosmetico’, y nada otro.

   “Anto bo sa kico, na final di e dia, mi kier a felicita mi amigo di infancia señor Mike de Meza cu el a para. El a dicidi di para na prome lugar pa su mes y su famia. Ya, aworaki esaki ta achter de rug. Mi por bisa cu nos tin un politico di San Nicolas cu ta sigur cu nos ta bay haya bos door di e señor aki. Pero den parlamento bo tin mas cu ta di Pariba di Brug, pero di con nan no ta confortable cu esaki, bo sa,” de Freitas a indica.

   El a bisa cu e ta mira cu Parlamentario Otami ta moviendo, y e ta mira Parlamentario Bermudez cu ta di Noord, cu bo ta mira cu mas di un manera ta ‘pro’ pa e desaroyonan aki.

   “Ami no ta bay para aki pa critica un Minister, pero tanten como cu nos no por sinta na mesa y papia di San Nicolas, eventualmente e periodo di gobernacion lo pasa, anto e ora bo tin cu bay confronta pueblo. Nos a bisa abiertamente, cu di Gobierno anterior nos tabatin nan atencion, pero nos no tabatin nan accion,” e president di SNBA a bisa.  El a agrega: “Pero ami no ta bay bringa cu nan, y ami ta indica cu pueblo pueblo mester tuma e cos aki na serio awo.  Tin hende ta papia, pero ban tuma e cos aki na serio pasobra tin di bay eleva esaki awor na un siguiente nivel.”

   Segun De Freitas, na final di e dia, nos tin un Aruba, y si bo compara e isla como un cas, y cu e Camber Principal ta pasando malo, ki dia, ki ora, nan sa su telefon, djis yam’e, y corda cu SNBA a trece tur sorto di ideanan pa Gobierno, incluyendo idea di expertonan.

   El a finalisa bisando: “Nos no ta un negoshi cu ta haciendo negoshi, pasobra prome cu bo haci negoshi bo tin di drecha e lugar aki.  Awo debi cu no tin un blueprint na San Nicolas, bo ta bay haya tur hende ta haci loke nan kier.  Y mi ta dirigi esaki direct na Departamento di Asuntonan Economico, pasobra mi a lesa di yen di cos cu nan ta haciendo, pero kico?  Nos na San Nicolas no ta sinti nan!  Ami mes tin mas di dos luna ta yamando Departamento di Asuntonan Economico, pero nada.”