Dialogo cu SPA a pone enfoke riba retonan cu Cuerpo Policial ta enfrenta

Parlamentario John Hart di AVP:

ORANJESTAD (AAN): Parlamentario John Hart di fraccion di AVP a informa cu, durante un reunion di comision cu no tawata publico, Parlamento a sostene un dialogo cu Sindicato di Polis Aruba (SPA). El a describi e encuentro como fructifero, durante cual e parlamentario­nan a haya oportunidad di scucha e diferente retonan cu Cuerpo Policial Aruba (KPA) ta enfrenta. 

Segun Hart, ta trata di retonan cu ta conoci caba, pero cu ta exigi atencion. Un di e puntonan cu el a destaca ta e situacion relaciona cu Respaldo y e dificultadnan cu polisnan ta enfrenta ora nan mester atende casonan cu ta involucra personanan cu problemanan di salud mental. 

Hart a enfatisa cu Parlamento mester dedica mas atencion na e tematica aki. Durante e encuentro, el a pidi presidente di Comision di Salubridad, parlamentario Goeloe, pa coordina cu Comision di Husticia un reunion cu Respaldo. E meta ta pa haya un panorama mas cla di e situacion y di e retonan cu ta presenta den practica. 

El a señala cu atende casonan relaciona cu salud mental por pone polisnan den situacionnan complejo cu ta exigi hopi di nan. P’esey, el a considera importante pa profundisa e dialogo cu e instancianan involucra. 

Hart a agrega cu e necesidadnan material di KPA tambe ta merita atencion pronto. Den preparacion pa e tratamiento di presupuesto, Comision di Husticia lo reuni pa aborda e necesidadnan aki, cu e meta pa Cuerpo Policial por conta cu e recursonan necesario pa cumpli cu su trabao.