Dos aña di prizon exigi pa adulto mayor di 79 aña kende a hinca otro homber cu cuchiu

Fiscal ta considera esaki un intento di mata

ORANJESTAD (AAN): Hues di Corte di Husticia a trata e caso penal cu Ministerio Publico a cuminsa contra e homber adulto mayor E.D. di 79 aña, kende ta wordo acusa di a hinca e homber R.P. cu cuchiu riba 9 Februari 2024. Aunke cu E.D. ta para riba cu e no a hinca cu cuchiu, Fiscal ta hay’e culpabel y a exigi 2 aña di prizon.

   Hincamento: Hues a mustra cu segun e rapport di Polis, R.P. a bay riba yiu di E.D. Tabatin bringamento. Dos otro hende mas a bin acerca y na dado momento tabatin hincamento. Ta asina cu ta E.D. a hinca R.P. cu cuchiu. Den sala di Corte tabata presente R.P., kende a haci demanda di daño.

Hues a puntra E.D. kico a pasa.

   Segun E.D. e tabata na su cas y a tende gritamento na cas di su yiu homber cu ta keda mas leu. E.D. a bisa Hues cu el a cana bay na e cas pero no ta mira su yiu L. Un otro yiu a bay yuda L. cu a wordo choca. Segun E.D., e no por a hinca R.P. El a bisa Hues cu den e cura tin masha hopi hero y e ta kere cu R.P. a dal su curpa contra un hero.

   Sospechoso ta nenga di a hinca: Hues a mustra cu E.D. a bisa Polis cu e no sa cu el a hinca. E tabatin un cuchiu di cushina den man. Segun E.D. e no a bringa y mucho menos hinca. El a bisa cu e no a mira tampoco kende a bringa.

   Hues a bisa cu un dama a bisa Polis cu R.P. y L. a cuminsa bringa, despues dos homber mas a yega. Mientras cu L. tabatin R.P. teni, un homber jong a pasa man pa un piedra y e homber di edad tabatin un cuchiu y a hinca R.P. E dama a saca potret di esun cu a hinca. Polis a mustra E.D. e potret y E.D. a bisa cu esey ta e. Den Corte Hues a mustra E.D. e potret y E.D. a bisa cu e no ta reconoce su mes. Hues a mustra un otro potret y E.D. a reconoce su mes pero ta para riba cu e no a hinca R.P.

   Hues a puntra E.D. si e tabatin un cuchiu of no. E.D. a para riba cu e no tabatin cuchiu. Hues a bisa cu na Polis, E.D. a bisa cu si e tabatin un cuchiu. Hues a mustra cu tabatin un caso contra e yiu homber di E.D.,  A., caminda Hues no a condena A. pasobra e ta haya cu A. a bay defende L. door di dal R.P. cu piedra.

   Tin potret: Hues a bisa cu tin potret di hinca cu R.P. a sufri. Hues a bisa cu R.P. a haci demanda di daño cu ta encera diferente cosnan door di e hinca. Segun R.P. te ainda e hinca ta molesti’e. El a bisa Hues cu 9 luna e no tabata traha y no por traha overtime.

   Mas o menos 2 mil Florin di overtime e no tabata haya pa luna. Un total di 18 mil Florin el a demanda.

   Exigencia Fiscal: Fiscal a bisa Hues cu ta bon cla cu tabatin hincamento. Dos biaha R.P. a wordo hinca. Un biaha na schouder y un biaha na stoma. Fiscal a bisa cu tin un hende cu a bisa cu el a mira E.D. hinca R.P. na lomba y barica.

   Ademas despues di e hincamento, e persona a saca potret di E.D. Fiscal a mustra cu E.D. mes a declara na Polis cu e tabatin un cuchiu y a sali pafor cu esaki. Fiscal a bisa Hues cu e no ta kere loke E.D. a bisa den Corte. Fiscal a bisa cu e testigo a bisa cu e cuchiu ta grandi. E cuchiu ta asina grandi cu a afecta higra di R.P. Fiscal a bisa cu R.P. a keda 6 dia interna den hospital. E ta considera esaki un intento di mata. Fiscal a bisa cu e no ta mira motibo pa E.D. a hinca R.P. dos biaha cu cuchiu. Fiscal ta haya E.D. castigabel. Pa cu e castigo, Fiscal a tene cuenta cu e edad halto di E.D. y cu e caso ta di 2024. Fiscal a exigi 2 aña di prizon kitando e tempo cu E.D. tabata sera.

   Pa loke ta e demanda di daño, Fiscal ta haya dificil pa dicidi riba e diferencia di salario. E ta kere 7500 Florin lo ta na su lugar. Tambe Fiscal ta haya cu no tin suficiente claridad riba cuanto placa a gasta pa tratamento. El a pidi Hues pa pone medida di pago.

   Defensa Abogado: Abogado mr. Carlo a bisa Hues cu E.D. a declara na Polis cu e tabata pela batata ora cu el a tende gritamento. El a bay y mira un homber tabata choca su yiu L. El a kere cu e homber tabata R.Y. cu ta e ruman homber di su pareha. R.Y. ta un conoci di Polis y E.D. a bay yuda su yiu L. El a kere cu R.Y. tabata kier a mata su yiu. E.D. a perde cabez y a hinca e homber.

   A resulta cu e homber ta R.P. kende a keda interna 6 dia den hospital. E abogado ta haya cu E.D. a bay yuda su yiu L., kende tabata wordo choca y tabata core peliger di muri. E dia ey E.D. tabatin 76 aña y el a hinca R.P. pa scapa su yiu. Abogado ta haya cu E.D. a actua den defensa di su yiu. El a bisa Hues cu e ta haya cu mester declara E.D. liber. E abogado no ta haya cu por papia aki di intento di mata. E abogado a cuestiona cu e demanda di daño no a wordo suficiente splica y cu pruebanan. E abogado tambe a mustra Hues riba e salud di E.D. cu no ta adecua pa E.D. bay sera den KIA.

   Hues a bisa cu e ta bay studia e caso y dia 1 October 2026 lo tin sentencia.