Fraccion MEP ta exigi claridad riba e prestamo di 50 miyon florin di SVb na Gobierno

 *Pensioen di pensionadonan na peliger?

ORANJESTAD (AAN): Fraccion MEP a dirigi pregunta na e Minister di Salud Publico pa haya claridad tocante e decision di Sociale Verzekeringsbank (SVB) pa pone Afl. 50 miyon na disposicion di Gobierno na un interes di solamente 3% pa aña. Esaki ta un interes mucho mas abou cu SVB por haya otro caminda, y esaki logicamente ta afecta e fondo di pensioen di biehes. 

MEP kier sa dicon SVB a tuma e decision aki, si a compara e interes cu otro opcionnan di inversion y cuanto interes e institucion lo por ta perdiendo cu e transaccion aki. 

E placa di SVB ta destina pa proteccion social di nos pueblo. P’esey, ta importante pa tin transparencia riba con e placa aki ta wordo administra y pa keda sigur cu e interes di e aseguradonan y pensionadonan ta keda na prome luga. 

MEP ta exigi claridad: ken a tuma e decision, riba cua base financiero y con ta garantisa cu e interes di e aseguradonan ta wordo proteha? 

Transparencia y responsabilidad ta esencial ora ta trata placa destina pa proteccion social di nos pueblo.