Conferencia DC ALFA 2026 a subraya importancia di colaboracion pa un futuro autosuficiente pa Caribe Hulandes

ORANJESTAD (AAN): Dutch Caribbean Agriculture, Livestock and Fisheries Alliance (DC ALFA) a sera su Conferensia 2026 cu exito,

teni for di 25 te cu 29 di mei na Sint Maarten. E evento a marca e prome biaha cu e conferencia anual a wordo organisa riba e isla di Sint Maarten y a subraya e importancia creciente di cooperacion regional pa fortalece seguridad alimentario, agricultura sostenibel, pesca y desaroyo di cria den henter Caribe Hulandes.

DC ALFA ta un plataforma di colaboracion estableci pa e departamentonan di agricultura di Aruba, Bonaire, Corsou, Saba, Sint Eustatius y Sint Maarten. E alianza ta promove cooperacion den agricultura, cria, pesca, seguridad alimentario y desaroyo sostenibel.

E conferencia a reuni rond di 90 representante gubernamental, piscado, criadonan di ganado, institucionnan educativo y partnernan regional pa intercambia conocemento, discuti desafionan comun y identifica oportunidadnan pa colaboracion.

E programa a consisti di discusionnan strategico, sesion nan cu stakeholdernan, un entrenamento riba desaroyo di cooperativa y un tayer tocante mehoracion di acceso na educacion y conocemento, comparticion di miho practicanan, bishitanan di campo, y firma di un Memorandum of Understanding (MoU) renoba entre e seis isla.

E conferencia a wordo habri oficialmente pa Minister Grisha Heyliger-Marten di Turismo, Asuntunan Economico, Transporte y Telecomunicacion (TEATT) di Sint Maarten, hunto cu Sra. Bernise Stoffer, Program Manager di Dutch Caribbean Partnership Program na RVO, representando e patrocinadonan di e conferencia, Sr. Hamza Kacha di Ministerio Hulandes di Asuntonan Economico y Politica Climatico (EZK).

Durante su discurso, Sra. Stoffer a reafirma e sosten continuo di Ministerio di EZK na DC ALFA y a enfatiza e importancia di envolve Cunukero, Piscado y Criadonan di Bestia activamente den discussionnan y den proceso di tuma decision cu ta toca nan sector. El a expresa aprecio pa e sosten continuo di Ministerio Hulandes di Agricultura, Pesca, Seguridad Alimentario y Naturalesa (LVVN), cu ta permiti RVO facilita cooperacion regional pa medio di Dutch Caribbean Partnership Program.

Ademas, Presidente di DC ALFA Sra. Nathalie Maduro, Directora di Departamento di Agricultura di Aruba, y Vicepresidente Sr. Shervin Frederick di Sint Maarten, a duna participantenan bonbini na Conferencia DC ALFA 2026. Nan a destaca e colaboracion fuerte entre e seis Isla den e ultimo cinco aña, cu a cuminsa cu un proceso di vision comparti y a culmina den e establecemento formal di DC ALFA. Nan palabra a subraya e compromiso continuo di e islanan pa colabora den mehoracion di seguridad alimentario, Agricultura sostenibel, Pesca y desaroyo di cria di bestia den henter Caribe Hulandes.

Entre e presentacionnan principal tabata un actualisacion di Sr. Gerbert Kunst, Representante di Hulanda na Aruba, Corsou y Sint Maarten, tocante e fondo di “Public Pillar” cu Hulanda ta pone disponibel pa e departamentonan di agricultura di e islanan di Caribe Hulandes. Participantenan tambe a ricibi un actualisacion di Sra. Jamy Gouwie, candidata pa President di Raad di Supervision di CariFoodFund (CFF), kende a splica desaroyonan tocante oportunidadnan futuro di financiamiento pa e sector agricola y e importancia di un enfoke regional pa fortalece seguridad alimentario y desaroyo agricola den Caribe Hulandes. El a expresa voluntad di CariFoodFund pa traha hunto cu DC ALFA y a yama bon bini e oportunidad pa colabora cu e alianza como partner regional principal den sosten di crecemento y sostenibilidad di e sectornan di agricultura, pesca y cria. Sr. David Mogollon, Head of Cooperaion, Delegation of the European Union na Barbados,  Estadonan di Caribe Oriental,  OECS y relacionnan cu  Caribbean Overseas Countries and Territories (OCTs) di UE, a duna un presentacion riba sosten di UE na e sector agricola den Caribe.

-Productornan primario ta pidi representacion mas fuerte

Un resultado importante di e conferencia tabata un iniciativa inespera di e 26 Cunukero, Piscado y Criadonan di Bestia cu a asisti e conferencia for di e seis islanan di Caribe Hulandes. Guia pa Sra. Nancy Prasad di Piskabon, e grupo a presenta un carta den cua oficialmente nan a reconoce DC ALFA como un plataforma regional vital cu ta representa productornan primario di cuminda. Nan tambe a pidi cu e alianza actua como nan representante den discussionnan regional di politica y den proceso di tuma di desicion.

E firmantenan a pidi pa DC ALFA hunga un rol formal den discusion nan riba agricultura, Pesca, Cria di Bestia, seguridad alimentario y desaroyo rural. Nan tambe a enfatisa e necesidad pa oportunidadnan practico di entrenamento, involucracion mas fuerte di stakeholdernan y mas sosten pa produccion local di cuminda.

Ademas, nan a boga pa programanan dirigi di subvencion y subsidio pa sosten productor chikito, innovacion, sostenibilidad y resistencia climatico.

E conferencia tambe a conta cu contribucion nan di expertonan regional y internacional, incluyendo representante di World Horti Center (WHC), University of the West Indies (UWI), Caribbean Agricultural Research and Development Institute (CARDI), Saint Barthelemy y Union Europeo.

E conferencia a sera cu e renovacion di  Memorandum of Understanding (MoU) entre e seis islanan di Caribe Hulandes, reafirmando nan compromiso cu cooperacion regional y cu desaroyo continuo di DC ALFA como un plataforma regional sostenibel. E MoU a wordo firma pa Minister sr. Geoffrey Wever di Aruba riba 28 di mei 2026. Riba 29 di mei 2026, firma adicional a wordo poni pa Minister Grisha Heyliger-Marten di Sint Maarten, Commissioner Bruce Zagers di Saba y Commissioner Rechelline Leerdam di Sint Eustatius. Commissioner Joselito Statia di Boneiru , y minister sr.Tyron Boekhoudt di Corsow a firma e MoU riba 2 di juni 2026 paso cu e representante no por a asisti e conferencia pa motibonan personal.

Conferencia DC ALFA 2026 a subraya un biaha mas e importancia continuo di colaboracion regional den promocion di un futuro mas resistente, mas autosuficiente y mas sostenibel pa Caribe Hulandes.

E proximo conferencia ta programa pa tuma luga na Saba aña siguiente bou di e tema "One Purpose. One Commitment. One Future".