Directora di DIMP a splica con pa cera un areglo di pago di impuesto via “Portal Bo Impuesto

ORANJESTAD (AAN)--  Luenne Gomez-Pieters, director di Departamento di Impuesto, den conferencia di prensa den cual a lanza, dialuna 4 di mei, e “Portal Bo Impuesto” oficialmente, a splica con por cera un areglo di pago via e portal aki.

“Un areglo di pago di maximo 24 luna cu un suma minimo pa contribuyentenan individual, di 100 florin y un suma minimo di 1000 florin pa companianan of comerciantenan, te cu un maximo di 24 luna”, Gomez-Pieters a duna di conoce.

El a agrega cu e contribuyentenan cu tin un experiencia menos agradabel door di manda un email of yama na telefon, pasobra nan kier a paga nan impuesto, pero no a haya contacto cu DIMP, pa motibo cu DIMP tin ekiponan chikito pa volumen grandi di trabao, for di entrante e fecha aki no mester para den rij, no mester manda email y no mester yama, pasobra nan mes por haci esaki den e confiabilidad mes di nan mesun cas, of negoshi.

“Nos ta sumamente orguyoso di e ekipo di Departamento di Impuesto, cu a traha riba e proyecto aki durante lunanan largo di trabao duro, ta procesonan complica, pero awe nos ta sumamente orguyoso di e servicionan cu nos por brinda nos comunidad, cu ta support tambe, cu ta duna e empuhe, apoyo, ora cu nos ta papia di cumplimento di impuesto, nos ta duna e contribuyente e facilidad pa e draai su mes su asuntonan di impuesto.

E di tres servicio cu nos ta brinda tambe den “Bo Impuesto Portal”, ta un resumen di pagonan haci den pasado, te cu cinco aña atras, cu ta un resumen historico di pagonan. Si ta un pago cu nos contribuyendo a haci cash na nos MFAnan, of na nos oficina principal, cu nos cliente a paga cu su debit card, online of online, of un factura di Directie Financien, nos ta cancela e debenan cu e tabata tin habri”, director di DIMP a relata. El a sigui splica cu e contribuyente por busca tambe den e mesun portal “Bo Impuesto Portal” su pagonan haci den su cinco añanan atras. Mescos cu ta custumbra cu online banking, sistemanan di banco comercial, e cliente tambe por busca den e sistema di Impuesto, sea cu e no ta corda e suma of e fecha, e suma cu el a paga of e periodo cu e ta buscando den e sistema, e ta haya esakinan. E pagonan por wordo mira den tempo real, e por down load na su cas y wak e informacion den e sistema “Bo Impuesto Portal.

Asina señora Luenne Gomez-Pieters, directora di DIMP a remarca.