Inspeccion urgente den sector hotelero dignidad di trahador ta prioridad

Parlamentario di AVP, Ing. Carlos Bermudez ta pidi

• Carta manda cu urgencia pa Ministro
• Ta pidi pa atende desigualdad den horeca 

ORANJESTAD (AAN): Recientemente DIARIO a publica e advertencia cu Parlamentario Carlos Bermudez a saca, pa mustra cuanto abuso ta ser cometi riba trahadornan den horeca na Aruba.

   El a mustra e.o. con trahadornan ta sufri di maltrato verbal, y mas.  Specificamente el a menciona:

Entre e denuncianan cu a yega na oido di Bermudez tin:

(*) Intimidacion y presion riba trahadonan.

(*) Rapportnan falso contra empleadonan.

(*) Suspension sin base solido.

(*) Retiro basa riba informacion incorecto sin duna oportunidad di defensa.

(*) Malcumplimento di leynan laboral.

(*) Bullying y harassment na pia di trabao.

(*) No cumplimiento cu e salario minimo legal (11,58 Florin pa ora).

(*) Discriminacion (incluyendo riba base di rasa).

(*) Trato desigual entre empleado.

(*) Abuso verbal.

(*) Carga excesivo di trabao. Mester haci mas cu loke e descripcion di trabou ta

prescribi.

(*) Falta di respet y reconocemento.

(*) Falta di oportunidad pa promocion.

(*) Abuso di poder door di managernan cu falta conocemento di leynan laboral.

(*) Contract y periodo di prueba ilegal.

(*) Pago total inferior na e salario minimo legal.

(*) Uzo di tip pa completa salario minimo (cual ta contra ley).

(*) Menasa den direccion di empleado cu ta expresa nan descontento.

(*) Falta total di perspectiva pa cu crecemento profesional.

(*) Preferencia pa stranhero en bes di promove talento local.

   Despues di a haci publico su preocupacion serio tocante situacionnan den sector hotelero, Parlamentario Bermudez a manda un carta oficial na minister di Turismo y Labor. Den e carta Bermudez a puntra si minister ta dispuesto pa desaroya y implementa cu urgencia un plan di inspeccion specifico pa e sector.

   Despues di e declaracion, mas y mas trahado a tuma contacto cu su persona, compartiendo nan experiencia. Loke ta sali na cla ta sumamente alarmante. No solamente informacion digital ta circula, pero tambe a drenta kehonan den postbus.

   Segun Parlamentario Bermudez, varios di e kehonan tin relacion cu gerentenan stranhero. Sin embargo, Bermudez ta enfatisa cu no por generalisa: no tur manager stranhero ta causa di problema.

   Bermudez ta pone enfoke riba solucion. Segun e parlamentario di AVP, ta momento pa tuma accion firme y trata e problematica na su raiz. Esnan cu ta abusa di trahadonan mester wordo coregi, y si ta necesario, orienta pa compronde y respeta e leynan di Aruba.

   Respeta leynan laboral no ta opcion. Ningun hende ta para riba ley, y nos no por tolera abuso contra nos trahadonan, asina Bermudez a declara.

   Bermudez ta finalisa cu un yamada pa unidad y fortaleza: “Hunto nos ta mas fuerte.”