Comision Nacional Patrimonio Cultural Intangibel ta reflexiona riba Dia Mundial di Libertad di Prensa 2026

Tema di UNESCO: “Shaping a Future at Peace”

ORANJESTAD (AAN): Dia 3 di mei ta conmemora World Press Freedom Day, un momento pa reflexiona riba e rol fundamental cu prensa liber tin den nos sociedad. Pero e aña aki, nos kier pone un enfoke special riba algo igual di importante: Patrimonio Cultural Intangibel (PCI) y con e periodistanan (prensa) ta funciona como guardian di nos identidad. 

Periodista como guardian di nos cultura

Den un mundo cu ta cambia lihe, prensa tin un mision mas grandi cu solamente informa. E periodistanan ta narado di nos historia, testigo di nos tradicion, y protector di nos memoria colectivo. Door di nan trabao, historia, custumber y expresion cultural no ta bay perdi, pero ta keda bibo pa generacionnan futuro.

  Dicon e periodistanan ta crucial pa PCI?

• Nan ta documenta y comparti practicanan cultural cu di otro manera lo keda den olvido.
• Nan ta crea consenshi riba balor di nos herencia cultural.
• Nan ta sirbi como puente entre pasado y futuro, entre comunidad y mundo. 

Rol di media den promocion di idioma y cultura

Idioma ta e vehiculo principal di cultura. Sin idioma, nos identidad ta degrada. Medio di comunicacion tin un responsabilidad grandi pa:

• Promove uzo di nos idioma local den un manera consistente y respetuoso.
• Preserva e rikesa linguistico pa medio di contenido autentico.
• Proteha contra e presion di uniformidad global cu por dilui nos singularidad. 

“Shaping a Future at Peace”

Esaki ta e tema cu UNESCO a scoge e aña aki enfatisando cu paz no ta solamente ausencia di conflicto, pero tambe presencia di respet, comprondemento y valorisacion di diversidad cultural. Un prensa liber, responsabel y consciente por contribui na un futuro unda tur cultura y idioma tin su espacio.

Awe, mas cu nunca, nos mester reconoce y apoya nos periodistanan – no solamente como portador di noticia, pero como guardian di nos alma cultural.

Libertad di prensa ta libertad di cultura.

Sin un, otro no por florece.