‘Intervencion necesario pa trece orden y siguridad den trafico’

Minister Dowers a prohibi Electric Step y E-Bikes:

ORANJESTAD (AAN): E siman aki, Minister di Husticia, mr. drs. Arthur Dowers, a anuncia un maneho mas stricto riba e uzo di vehiculonan electrico riba camindanan publico. Pa basta tempo caba, e uzo di Step Electrico, Scooter Electrico y Bicicleta Electrico ta bayendo for di control, creando situacionnan cu no por sigui ignora.

   Specialmente den e area di hotel, e situacion ta evidente: decenas di step electrico, bicicleta electrico y hasta scooternan grandi electrico ta para riba acera, caminda y hasta unda peaton tin cu cana. E realidad aki ta pone presion riba infrastructura existente y ta crea riesgo directo pa siguridad di tur usuario di e espacionan publico.

   Segun e Landsverordening Wegverkeer, e vehiculonan aki ta considera como vehiculo di motor, cu ta nifica cu nan mester cumpli cu reglanan specifico pa por ta riba caminda publico. Sinembargo, ningun di e vehiculonan menciona ta cumpli cu e exigencianan legal estableci.

   E Comision Siguridad di Trafico a pasa varios luna trahando activamente riba un solucion structural pa e problema aki. Despues cu pa falta di corahe di ministernan di husticia di e gobiernonan anterior, awe, despues di evaluacion profundo y coordinacion cu instancianan relevante, Minister Dowers a bisa ta basta: mester restablece orden y siguridad den trafico.

   Exigencianan legal y siguridad: E obhetivo principal di e maneho aki ta pa garantisa siguridad riba caminda pa esnan cu ta uza e vehiculonan aki, y alavez pa otro usuarionan manera automobilistanan, ciclistanan, peaton y tur esnan cu ta depende di acera y camindanan publico pa move cu trankilidad.

Pa participa den trafico di forma sigur, vehiculonan mester cumpli cu e exigencianan di ley segun e Landsbesluit Voorschriften Voertuigen. Esaki ta inclui brake cu ta funciona bon, luznan adecua, identificacion tecnico y structura sigur. Ademas, tin obligacionnan manera rijbewijs valido, registracion di vehiculo, inspeccion y minimo un seguro WA.

   E realidad actual ta mustra un falta total di cumplimento. Doñonan di e vehiculonan aki no tin seguro, no tin aprobacion tecnico di DTI, ni ta paga motorrijtuigbelasting. Disponibilidad y acceso facil ta permiti cualkier persona conduci sin control riba capacidad ni conocemento di nos leynan di trafico.

“No por sigui ignora e situacion aki y doñonan di e vehiculonan aki mester tuma responsabilidad of autoridad lo tuma accion,” Minister Dowers a declara.

   Ademas di e riesgo di siguridad, e bista den sector turistico ta deteriora. Usuarionan cu ta frecuenta e area turistico ta mira e vehiculonan aki como molester den trafico, afectando tanto e experiencia como reputacion di Aruba como destino sigur y ordena.

   E consecuencianan di falta di regulacion ya ta visibel. Practicamente tur dia tin accidente unda e tipo di vehiculonan aki ta envolvi, incluyendo incidentenan serio y hasta fatal den pasado. Den caso di accidente cu otro vehiculo cu si ta cumpli cu ley, cobertura di seguro ta bira un problema serio, aumentando impacto financiero y legal pa e partidonan envolvi.

   Gobierno, bao di liderazgo di Minister Dowers, ta tuma un posicion firme y decisivo. E maneho nobo ta enfoca riba control, cumplimento cu ley y clarificacion di reglanan pa garantisa cu espacionan publico ta keda sigur pa tur hende.

   Por ultimo Minister Dowers a manda un mensahe cla na tur doño di e vehiculonan aki, "kita nan for di caminda publico of autoridad lo kita esakinan" y esaki lo ta acompaña cu multa pa cada vehiculo cu autoridad kita.