Ta urgi Gobierno pa aloca e 70 miyon Florin di fondo di inversion pa yuda famianan cu tin mester

Evelyn Wever-Croes:

ORANJESTAD (AAN): E efectonan di guera lo ta bay ta devastador y hopi hende lo perde trabao door di e crisis aki, asina Parlamentario Evelyn Wever-Croes a bisa recientemente. El a remarca cu su Gobierno, Gabinete Wever-Croes a logra acumula fondonan di 1.9 miyon Florin prome cu Covid. E mesun Gobierno aki, a logra surplusnan di hasta 500 miyon Florin.

   Y riba esaki tin un fondo di inversion di 70 miyon Florin cu a wordo reserva. Sinembargo, el a remarca, e Gobierno actual no a gast’e pa nada mientras cu costo di bida ta aumentando.

   Fraccion di MEP ta urgi Gobierno pa haci uzo di e fondo di inversion aki. Mester bin cu cambio den presupuesto den Parlamento pa aloca e fondo aki pa yuda famianan cu ta mas den necesidad. Entre otro, por reintroduci paketenan di cuminda manera Gabinete Wever-Croes a haci den tempo di Covid, un tipo di Fase cu ta loke a yuda esnan cu a perde trabao durante Covid, un tipo di subsidio di salario cu gobierno anterior a laga cla atras den tempo di Covid.

   El a remarca cu contrario na awo, e gobierno anterior no tabata tin esaki cla prome cu a ehecuta nan pero mester a cuminsa yuda pueblo di biaha prome cu regla e ley. Y esaki ta loke cu Contraloria General tin contra e gobierno anterior.

   “Pero awo e Gobierno actual a haya e ley aki cla. Y por aloca e 70 miyon Florin di fondo di inversion pasobra e aña aki lo no tin mucho inversion tampoco. Y aloca e placa aki pa yuda esnan cu mas tin mester di dje, pasobra e efectonan di guera lo ta devastador y hopi ciudadano lo perde trabao”, Parlamentario Wever-Croes a enfatisa.