Siguerd Obispa a gradua na Universidad di Aruba cu tesis encuanto fruta di mango

ORANJESTAD (AAN): Siman pasa, Nathalie Maduro kende ta  Directora di DLVV- Santa Rosa,

a wordo invita pa e Facultad di SISSTEM di Universidad di Aruba pa presencia e defensa di resultado y tesis di un estudio conduci na Santa Rosa.

   E studiante Siguerd Obispa a defende su thesis pa su Bachelor cu e titulo: “Natural Convection Drying of Mango Slices: An Experimental Study.”

   Esaki ta yena Santa Rosa cu orguyo y speranza ora mira con hobennan ta dedica nan tempo y conocemento na temanan relevante manera esaki.

   E estudio ta trata e proceso di seca (drying) di slice nan di mango mediante conveccion natural, usando un structura fabrica di glas y aluminio cu ta uza calor solar. E diseño di e ekipo a wordo desaroya pa e mesun studiante, bao di guia di su docente an y mentor.

   Pa Santa Rosa, esaki ta di gran importancia, ya cu e sistema por contribui na reduccion di perdida di producto fresco. Sinembargo, mas investigacion ta necesario cu otro tipo di producto pa por determina un “shelf life” confiabel. Actualmente, tin un demanda creciente pa fruta seca, hopi biaha importa.

   Santa Rosa ta spera cu mas studiante local lo wordo inspira pa sigui estudio y specialisacion den e ramo aki, cu tin un valor agrega importante pa nos siguridad alimentario y desaroyo di nos sector primario. Masha pabien na Siguerd Obispa y na henter e team di Universidad di Aruba.